Ami Goykaramnim Povitr Sobhek ek bhagevont dilo mhonn amkam obhiman bhogunk favo. To ek maha-dhormporgottnnar. Tachea pavlamnim cholun amchea jivitantlean ami Jezukuch porgottcho. Ani amchim magnnim ani gorzo, tache vinovnnen ami Jezu mukhar dovorcheo.
Tacho zolm ani xikop – Juze Vaz, Cristopher Vaz ani Maria Miranda hancho tisro put. To April-ache 21ver 1651 vorsa aplea avoychea ghora Bannavle zolmolo. Zolmachea atthvea disa Jacinto Pereira, hea Jezuit Vigaran Sant Juanv Batistache Igorjent, Bannavle taka Povitr Snan dilem. Mullavem xikxonn tannem Sankvalle kelem. Fuddlem xikop korunk taka Adlea Goyam Sant Pauluchea Kolegint patthoun dilo. Tannem padriponnachem xikop kortoch, sovis vorsanche pirayer, Juze Vaz-ak yadniki makhnni favo zali.
Tacho vavr – Ceylon (atam Sri Lanka)–ant koxttoutolea Katolkanchi khobor aikun thoim vochunk tachem kalliz axetalem. Thoim vochun tannem khup boro vaur kelo. Survatek Padr. Juze Vaz Ceylonant vavurlo ani tachea uprant dusrea suatancher padri gele. Guptim bhes bodlun ponchvis vorsam, Ceylon-ache povitr sobhek aplo jiv korchilo, tancho bhavarth rakhlo ani samballo. To veg-veglle bhes korun serkari odhikareamche bhirantin loka sorxim pavtalo ani tankam Sonvskar vantt’ttalo, Devachem Utor porgott’talo. To aplo gonvllik vavr sufoll zaunk tancheo bhaso xiklo. Kovita ani gayonam tannem rochlim. Ani aplea fattlean aplo vavr fuddem vhorunk tannem Dev-sondexkarank toyar kelim. To magnnim choloitalo, piddestank bhett korun tanchi khobor ghetalo, tornnatteank ani nennarank xikounn ditalo ani he Dev-Sondexkar hea vavrant taka adhar ditale.
To amcho obhiman – Sant Juze Vaz hacho amkam obhiman bhogunk favo. Amchea Goyant noveo-noveo Igorzo tachea manak bhettouncheo. Ami Jezu lagim magtanv tedna tache vinovnnen magchem. Amchea ghoramnim tachi murti vo chitr aschem, ani tachem xegunnim jivit ami apnnailear Jezuchi mhoima ami fankartoleanv.
Janerache 16ver, zo zaun asa tacho mornnacho dis, Sant Juse Vaz-achi Porob ami somorombhtanv. Sogleank tumkam ek povitr ani khuxalbhorit Porob anvddetam
-Eudecia Vaz