Marie Magdalene nanv mhojem,
Jezucho hanv khub mog kori,
Mornant tachea vanvoileo dukhancheo zhori.
Fantea pharar, dhavun-dhavun geli somadhixi,
Somadhi ugti, kalliz dukhi – khonti,
Vaspus keli, punorjivont zal’leach Jezuxim.
‘Marie’ mhunnon marlo ulo, nodre muhkar Jezu ubo,
Punn hanv taka ollkunk visorli.
Mhozo Jezu punorjivont zala,
Hanvem taka pollela.

Devan mhaka rochla,
Tachi rochna, Dev-dut hanv.
Jezu roddlo, rogtachi zhor vhanvli,
To koxttovta tem polleun, hanvem dukham golloili.
Mel’li kudd olen guttlaili, somadhint nikipili,
Somadhin hanvui aslom, tache veli nodor hanven add na keli.
Aplech podven punorjivont to zalo, sontos amkam bhoglo,
Magdalache Mariek sondex pattoilo, tinnem porgottlo.
Mhozo Jezu punorjivont zala,
Hanvem taka pollela.

Kuddin ghott, bhov vhodd,
Rong kallo, hanv to somadhicho fator.
Jezuk somadhint ghalo, mhaka darar ubo kelo,
Votant koxttovlo, mellunk na udka pelo.
Mhaka kuxin kaddunk boll zai mon’xachem,
Punn te rati, somadhichea darantlo
Hanv koddsorlo koso?
Ek vorixtt podven mhaka mogan hat lailo,
Vengent dhorun khuxin dovorlo.
Mhozo Jezu punorjivont zala,
Hanvem taka pollela.

Dhovea rongachi, kuddi pangurpachi,
Patoll kuddichi, hanv ti oli.
Avoichea hatantlo kaddun, mhoje vengent taka ghatlo,
Mhojea dhovea rongan tachi kudd dampli.
Ballok astana, tachem vinglleponn hanvem lipoilem,
Tachea mornant, kuddik tache vengoili.
Tachea rogtan, mhojem dhoveponn nirmollponnan bodol’lem,
Tisrea disa mhoje vengentlo to uttlo,
Mhaka aplo govai koso somadhin sanddun gelo.
Mhozo Jezu punorjivont zala,
Hanvem taka pollela.

Hanv bhirankull nhoi, punn sogllim mhaka bhietat,
Mhaka rong na, punn kallo mhaka mhunntat,
Hanv kallok, nhoi mogacho ballok.
Somadhicho fator ugoddtoch, hanv nanch zalo,
Bond kortoch porot ailo.
Olint aslolea Jezuk hanvem pollelo,
Te rati fator bonduch aslo, uzvadd koso fanklo?
Mhoimecho uzvadd fanklo,
Hanv nattak zait ghelom, punn vetanam Jezuk pollelo.
Mhozo Jezu punorjivont zala,
Hanvem taka pollela.

-Fr. Leslie Gomes