Koxtt moronn sosunk veche adim,
Jezun apostlank apoile jevnam mezar,
Sangat onbhovlo, bhavnam porgottli,
Vell thoddo, punn utram sobar na suttlim.

Bara apostl Jezuche,
Mogache, hurbevont ani kalljidarponnache,
Jevnna mezar hajir asle,
Bhavponnacho ekvott onbhovunk pavle.

Nimmanem jevonn Jezuchea-xisanchem,
Sthapnnem misa bhettechem,
Ugddasak mhojea sodanch korchem,
Mogachem jevonn Jezuchem.

Aplea iadnikponnan ghoddlem iadnikponn sasnachem,
Koxttam-dhukhichem vhodd sontosachem,
Mon’xam khatir, mon’xam modlo vinchlem,
Vortea Devak nivoddchem.

Chakrachem rup gheun, paim dhule apostlanche,
Devuch zalo udaronn moga-sevechem,
Mogachi adnia disan-dis pallchi,
Hich khuxi Somia Jezu Kristachi.

Ami sogllim pattlavdaram Jezuchim,
Utram tachim kallzant samballchim,
Moga-sevechim pavlam amchim,
Hich jinn Kristi jivitachi.

-Fr. Leslie Gomes