Gõyant kaim vorsam vaurlea uprant, mhoji bodli misanvanchea eka kheddea ganvant zali. Eke torechi bhirant aili. Punn Jezucher patieun ani Ankvar Mariechea adharan hanvem mhojem fuddlem paul marlem .
Nemlolea disa hanvem mhoji vatt dhorli. Gõychi xim’ utrun Ghatt kaddun Bellganv pavlim. Monant zaite proxn ghollttale. Xekim, Sangargalli (Khanapur) aslolea ‘PREMA GHAR’ hea amchea Konventant hanv bhitor sorlim.
Ek veglloch ganv, choddso lok durboll, lokachi bhas ani chal veglli, Konknni, Marathi ani Kannada uloupi lok to. Sogllench attvench koxem. Ami tegui sisteri novim axil’lean, hem ek amkam vhodd avhan aslem. Lokachi vollokh korun diunk pasun konn naslo.
Eka disa, tea ganvcho put, ek padri amkam bhett korunk ailo. Ek Anj boddvo koso tannem amkam aplea ganvchi soglli mahiti ani vollokh korun dili. Amkam ganvchea lokank bhett diunk vhelim. Lok khup sado, ugtea monacho, lhanvik ani udar kallzacho. Aplinch koxim, ghorantlea vangddeamni hanstea mukhamollan amkam yeukar dilo. Gorib zait punn tanche sovem udarponn aslem. Ghorant bosonk kodelam naslim punn xendri ghalun amkam bosonk ditalim. Sokla boson, ek kuttumb koxem, tanchea sangata vell sarunk amkam khup khuxalkai bhogtali. Tanche lagim kitem asa tem , zaum, cheav, xorbot, udok, adi. amkam haddun ditalim. Sumanak ek pautt toxench goroz poddtta tednam amchi tankam bhett zatali. Tanche khatir ami magtalim.
Amchi-tanchi vollokh vaddot vetali. Lok aplem sukh- dukh,koxtt, gorzo amkam ugteponnim sangtalo. Tancheo gorzo xarthi pavounk zaito ami thokos ghetalim. Bism Saibachea adharan bhurgeank fuddlem xikop korunk adhar ani her vevostha korop amchi zobabdari zali. He toren, amche sombondh tanche koddem vaddttale.
Tornnatteank ani bail bhurgeank, bholaike-xibiram ghoddun haddttalim. Mahila Monddollank margdorxon divop, xetant vaur korpi lokank boilam-zoddem, udkachi vevostha korunk water pump divop toxench ghoram bandunk pasun amche koddem zata te porim tanchea adharak ami pavleant.
Hea misanvanchea ganvamni, lokank misachi bhett dispott’ttim mellonasli. Chear te panch kilometer cholun lokak mellonk vetalim ani Padri Vigara sangata misachea bolidanant vantto gheunk tankam adhar kortalim.
Misanvanchea ganvcho onnbhov veglloch. Poristhiti pormannem jiyevop mhonnje, tea lokachea jivitant bhitor sorun, tanchi bhas, tanchi sonskrutai, tanchem veglleponn mandun gheun, tankam adhar korop. Hem sogllem kortanam, hanvem tor khup onnbhovlem. Onnbhovlolo Jezucho mog, poristhiti mandun gheun dusreank diunk mhaka boreak poddlem. Mhakach unnem korun, dusream khatir jiyeunk, hanv xiklim. Jezu lagim amcho sombondh thirailear, misanvanchea ganvamni seva diunk khup sompem.
Sr. Xaverita Fernandes
St. Joseph Convent, Aquem Margao