Hea vorsa ,Sant Anton-ichem Trezen ani Porob vhodde bhoktin ani umedin zalem. Hea tera disanchea Trezen/Porbek amchea ganvcho tosoch lagxilea ganvcho, zoxem St.Jose de Areal, Davorlim, Chandor, Raia, Curtorim, Quepem, adi, zaito lok hajir zalo. Sogleanim ap-aplim veg-vegllim magnnim, Bhagivont Anton-ik fuddem ghalun Devak ubarlim. Khoxechi khobor mhollear Zaiteanchim magnnim Devan xarti pavoilim ani sobemazar tannim Devache upkar attoile. Khorench sangatim eka-meka passot jednam ami magtanv, Devak amchem magnnem avoddta ani maglolem favo korta. Devache vhodd upkar.!!
Maiache 31ver amcho novo Padr Vigar, Fr.Simpliciano Fernandes, hannem Maddiecher axirvad ghatlo. Novea Padr Vigar-ak, fulam bhettoun, hajir aslelea firgozkaranim ievkar dilo.
Jun-ache 1-ler san amchem Trezen suru zalem asun 5.30 horancher Ters, Kurov ani Ladain ani tea uprant 6.00 horancher Povitr Misachi Bhett. Dor disache vixoi amchea dispot’tea jivitacher ani Sant Anton-ichea sabar milagrincher attaplole asle ani amchea Iadnik bhavanim bore bhaxen somzonni diun amchem jivit koxe toren bodolchem, tacher bhor dilo. Fr. Macson Fernandes ,Fr. Franky, Fr.Jollyson Fernandes, Fr.Anil Kumar, Fr.Savio Barreto, Fr. Movin Menezes, Fr.Daniel Pereira, Fr.Snyter Pereira ani Fr. Simpliciano Fernandes, hannim Trezen-achim Misam bhettoun provochon kelem. Nimannea disa (VESPR) amchea Padr Vigar-achea hatantlean Prarthan (PETITION BOX) ugddun, buroun ghatlelea “Petitions”-ankam uzo pettoun soglim amchim magnnim ami Devak ubarlim.
Jun-ache 13ver amchi Porob vhodda dhobajean ani ghonnghonnan somorombhli. Altar ani sorvbonvtim soglem fulanim nettoilolem ani pollounk nazuk distalem. Fr. Hermogenes Fernandes, Querim-cho Padr Vigar, sangatim Misant ,Mukhel Iadnik aslo. Porbechea disacho vixoi aslo, “Sant Anton-iche mozotin bhorvanxean soitana add zuzunk vaurumia” .Hea vixoiacher Fr. Hermogenes hannem borem provochon kelem ani hajir aslolea lokak bhov manovlem. Sompounche adim tannem ek Sant Anton-ichem sobit git gailem ani aikun lok dhadoslo. Sangatim Misant vantto gheunk asle, Fr.James Torres e Silva, Fr. Richard Crasto ani Fr. Movin Menezes. Tea disa Devache kurpen pavs naslo ani sogleank eunk-vochunk ani Misant vantto gheunk sompem zalem. Padr Vigar, Fr.Simpliciano Fernandes, hannem hajir asleleank Porbechim un-unit porbim dilim. Tech porim Somiti-chea nanvan hanvem sogleanche upkar attoile. Misa uprant sogleank “Snacks” vanttun, eke bhaxen, porbechi khuxalkai sogleam thaim vanttli.
Zaitea bhava bhoinnamnim hem Trezen/Porob ortabhorit korunk zaito adar-sohokar dilo, zaum poixeanim vo ier vostu bhettoun, zalear ieranim fuddem sorun dor disa ek famil koxi, sogli toiari korunk, zoxe porim altar nettounk, safai korunk, Sound cholounk ani sabar kama korunk adar kela, polleunk borem distalem. Sant Anton-iche vinovnnen Dev tancher sogleancher bhorpur axirvad ghalum.
Amchem vorsavollichem Trezen/Porob sompli khori, punn amchim magnnim chaluch astelim. Heach nimtan, dor mhoineak, poilea mungllaradis sanjechea 6.15 horancher, Ters, Kurov ani Ladain sodanche porim chaluch astelem.
Sant Anton-iche mozotin favo zalelea dennea khatir Devak ami dhinvasumia ani hem Devosanv anikui choddonk ani vaddonk sodanch Devak prartumia!!!
Felix Dias