Mogall Firgozkaramno,
COVID-19 piddek lagun sogllem bodlunk laglear Marsache 22ver sarkhem ek voros zalem. Hea vorsa bhitor soglle torechem vaitt-borem soglleanim onnbhovlem. Konn girest zalo, zalear konn bhikek pavlo. Konn dukhant poddlo zalear bhov thoddo konn kuxal zalo. Konn konn apleam ghorcheam koddlo pois urlo ani doxim zalo. Konn pois ghelolo to thoinch urlo. Hantunt modem kitlo dubhav ani bhirant gheun akhem voros sarlem.
Atam hi COVID pidda unnem zaun ani vokod mellun jiv il’lo hollu koso zaun sogllo lok bhair sorla. Chodd-xeo vostu novean suru zaleat. Lokanchea tonddar il’lo hanso dixtti poddta. Nirxel’lo jiv atam thoddo hollu zala. Punn ek mat. Purnnponni sogllem eksarkhem zatlem oxem nam.
Prachit kall-ant legun amcho jiv osoch pirgollta. Soglle kodde dukh xem zata. Faleam kitem zatlem tem konnakuch khobor nasli. Jezuchea mornnant soglle dukhi zal’le. Monant dubhav ail’lo. Punn Jezu punorjivont zalea uprant xinsank legun kuxalkai bhogli. Soglle kuxalkaien ani umedin punn titleach dubhavan xis Jezuchea fondda-xim danvle. Uprant Jezu punorjivont zala mhonn kuxal zale. He pavtt Jezu tankam sogllo dusrech torecho koso dislo ani taka ollkhunk zaite pavtt xisank addkoll zali.
Hea fuddem amkam kitem novem asa mhonn Dev zannam. Punn sogllea modem punorjivont Jezuk ami polleunk pavlear puro. Hench zatlem amchem Pask. Hoch zatlo amcho novo sonvsar. Novem Jeruzalem.
Soglleank tumkam kuxalbhorit Paskanchi porob anvddetam.
Tumcho Vigar,
Fr. Andrew Pereira