Mogall sompadpea,

Sogllea Aquem-chea firgozkarank maye-mogan noman kortam.

‘PORMOLL’ hea tumchea firgoz-potrak onumchea vorsak 21 vorsam bhortat mhonn amkam chodd khuxalkai bhogta. Ek firgoz-potr suru korunk sompem, punn vella-vellar tem uzvaddak haddop hem ek mott’ttem avahan. Ani tumi umedin ani mogan ho vavr fuddem vhortat dekhun sogllea Sompadpi Mondollak amchim hun-hunit porbim.

Tumchea potracher amkam dorjedar lekh vachunk melltat zache vorvim amcho bhavart mozbut zata. Borounk sodtoleank hem tumchem potr sondhi dita. Ani hem potr vachun, Firgojent jem kitem ghoddtta ani ghoddchem asa, tachi mahiti amkam mellta. Hea firgoz potra vorvim firgozkaram modem axil’lo mog ani ekvott vaddtta mhonn tumkam ami xabaski ditanv.

Padr Vigaracho pattimbo nam zalear hem gonvllik potr sarkem cholona. Fr. Andrew Pereira – koddlean tumkam sohokar mellta dekhunuch ho tumcho vavr sufoll zata. Aplea sondexantlean to aplea kallza monantlem boroun sangta. Thoddim aple lekh vellar dhaddtat, thoddeank ugdass korcho poddtta. Punn hi zobabdari sompadpi ani tacho mondoll bore bhaxen palltat mhonn ami tankam dhinvastanv. Xhaptoleankui ami dhinvastanv, xhapop nigut asa. Xhapche adim he soglle lekh ‘computer type’ korun mandavollir ghalunk zai, ho guptim vavr kortoleank amcho noman. Xhapun zatoch vibhagachea fuddareamnim tem ghara-gharamnim pavounk zai. Soglleank mhoje dhinvas.

Hea potrank anikui bhag choddoil’lo zalear; mulakhati, vichar –zobab, onnbhov gozali ghatloleo zalear tem odik rongit zavpachem. Ani hea tumchea firgoz potrachem nanv konknni asa mhonntoch anikui lekh konknni bhaxen uzvaddak ail’le zalear, hea potracho mol ani dorzo vaddtolo aslo.

Tumkam soglleank porbim ditanam hea gonvllik potra vorvim firgojecho vavr odikuch folladik zatolo mhonn ami as ballgitanv.

Tumkam borem magun

Hanv tumcho mogall
Fr. Nevel L. S. Gracias
VELL’LEKAR