Tadev: Simao Titiv, Dev Boro dis dium. Aiz tuka Misak hanvem pollounk nam. Kitem zalem tor?
Simao: Baba Tadev, Tukai Dev boro dis dium. Aiz hanv poilea Misak ghelolom. Hea disamnim ghormi chodd zalea nhoim, taka lagun vot chodd zaunche adim hanv ghora pavlom.
Tadev: Prachit Kallache dis anim soglim sompeponnam asunuim, kitlinch amchim bhavam – bhoinnam Misak pasun dixtti poddonant.
Simao: Ami kitlim noxibvont. Thoddeank kitle-xech mhoine Misachi bhett favo zaunk nam, Kitleo Igorzo ani Kopelam azunui bond asat. Punn amche Iadnik bhav, zaito thokos gehun, amkam hi Misachi bhett favo kortat.
Tadev: Thoddim zannam azunuim aplea Mobile vo TV-cher Mis polletat.
Simao: Piddest vo Zhannttim polletat tednam borem asa. Punn ghoddta tannim Igorjent ieunk zai nhoim? Tadev Bab, Krist-Prosad mellonastanam, Misachi Bhett purnn zaun ieta?
Tadev: Kednanch nam, Simao Titiv. Krist-Prosad xevtokuch, ek veglloch sobhav amche sovem disun ieta, nhoim? Tuje sangata Jezu ravunk ieta mhonntoch, Tuzo akho dis boro veta.
Simao: Valor tuka, tunvem borem sangleim. Zannaim tum, ami lhan astanam atam jim sompeponnam asat, tim adim naslim. Zaite kaide asle.
Tadev: Koslim sompeponnam ani kosle kaide, Titiv?
Simao: Zalear aik.
- Misant vantto gheun, Krist Prosad xevtolo zalear, kitem khatolo-pietolo zalear, ek vhor adim khaunk zai aslem.
- Krist – Prosad xevlea uprant, thimpi bhair uddovche adim, udok vo kitem pieunk zai aslem.
- Misak veche adim, Pai-Maim, kitlech pavtti vichartalim patok kelan zalear ani Kumsar korunk agro kortalim.
- Misa adim, Igorjent vochun, Povitr Sonskara mukhar dimbi ghalun, magnnem korunk zai aslem.
Tadev: Punn atam oxem nam, nhoim?
Simao: Nam, oxem nhoim, punn Atam chodd sompem zalam. Dusro Krist-Prosad xevi-na mhonnon, hanv xevtam kai dista. Chodd gorjechem tem, kurpent nastanam vo patkant astanam, Krist –Prosad xevunk favonam kiteak tum anink ek vhodd patok adartai.
Tadev: Zaiti bori mahiti mhaka tunvem dili Titiv. Hanv hem sodanch monant dovortolom. Vetam hanv. Mhoji maim mhoji vat polleta asteli.
Simao: Boro korun voch. Devan tujer zaito axirvad ghalum.
Felix Dias