Simao: Dev boro dis dium baba Tadev.
Tadev: Tukai dium Simao Titiv. Tum zaitea disamnim dislo, dekun borem dislem.
Simao: Hea disamnim zaito pavs poddlo nhoim, dekun choddso bhair sorunk nam. Tujem iskol koxem cholta? Atam soglem niamit (regular) zalem nhoim?
Tadev: Oi Titiv. Atam soglem ttika-ttik cholta punn sogleanche motint matxe ‘COVID’ –ak lagon bhoim asa kiteak zaitea bhurgeanim vaccine gheunk nam.
Simao: Devanuch tumkam samballchem. Hem duens portun hea disamnim matxe vhaddlam munn sangtat, dekun kallji gheunk gorjechem. 
Tadev: Eke vatten hem duens fatt soddinam anim dusre vatten xikpacho dobhav (pressure).
Simao: Bhurgeamnim xikunk zai nhoim, tumcho fuddar boro zaunk? Dobhav ani koslo?
Tadev: Dobhav vhoddilancho Titiv. Amchim Pai-maim, toxench xikxok amkam choddantle chodd gunn melloun gheunk agro kortat.
Simao:  Oxem ghoddonk favo nam Tadev.
Tadev: Titlench nhoim. Amkam amchea dusrea ixttam ani xikpeam thaim sor (compare) kortat
Simao: Zonn eklo ap-aple kuveti pormannem aplem xikop kortat,  tor dusream bhurgeank sor korun koslo faido?
Tadev: Oxem korun amchea monant niraxiponn nirmann zata. Soglinch eke bhaxen assonant. Zonn ekleachi xikpachi thakot veglli asta.
Simao: Tum sarkem uloiloi. Eka hatachim panchui bottam veg-vegllim astat. Ekach gharant pasun dogam bhurgim aslear, tim ekech toren xikunk pavchinant. Tankam dogaimkui sor korop chukichem.   Tadev: Oi Titiv, oxem korun, tim xikunk matxe fattim astat tednam tanche sovem ami vaitt adartat oxem mhaka tor dista.
Simao: Titlench nhoim, oxem kelear, oslim bhurgim adlea-von chodd vaitt porinam gheun ietat.
Tadev: Anink ek dusri bhazu mhol’lear, atam dhakttim bhurgim passun, sonsunk zainam zaun, rokddinch atmghat porian korunk fattim-fuddem chintinant.
Simao: Kitli dukachi gozal hi.
Tadev: Amchea vhoddilamnim, odik korun avoi-bapain oslea vixoiacher bhorpur kallji gheunk bhov gorjechem. Simao: Punn tech porim avoi-bapaik aplim sogllim bhurgim borim xiklelim zai. Tea pasot, boro niall korun pavlam fuddem marunk tanche pasot magum-ia.
Tadev: Borem Titiv, dusre pavtt mellchem.
Simao: Boro korun voch, pavs ieuncho zalo.

Felix Dias