Tadev: Dev boro dis dium, Simao Titiv. Aiz taktin khoim vochunk bhair sorlai?
Simao: Dev tuka kurpa dium, Tadev. Hanv Ponnje vetam, Azad moidonar dharna ani zomatint vantto gheunk.
Tadev: Titiv, he gormeche dis ani oslea poristithint tum zomatik vetai? ani Kosli zomat ani dharna?
Simao: Hea disamnim tunvem aikonk nam? Ailelea disa kosli nam kosli zomat ani dharna zata ti? Ho chollvoll chaluch asa. Zaum ti udkak lagun, rosteak lagun, ‘Railway-k lagun, Kadamba-che kamdar aplea pagarak lagun, Vidhan Sobhent apleak zage rakun dovrunk, ‘ST’ bhavam-bhoinnachi chollvoll, “EVM” – motam ghalpachea iontrank lagun, ani zaitea ieram karannank lagun hem girgirem chaluch asa.
Tadev: Punn hem soglem kiteak lagun ghoddta?
Simao: Hem sogllem Sorkarachea vaitt ievzonneo ani nirnnoi-ank lagun zaunk pavta. Amche zaite somajik karyakarte, fuddem sorun, jem vaitt asa tacher nixedh marunk lokak uskaitat ani tanchea adaran fuddlim pavlam ghetat.
Tadev: Hakach lagun tum vochunk bhair sorlai?
Simao: Oi Tadev. Amcho soglleancho tenko aslea xivai kaim ghoddonam. Te babdde kariyakarte ekttech kaim korunk xokonant.
Tadev: Sarkem tujem Titiv. Aiz kal gorib bhavam-bhoinnank konn adhar dita? Tanchea faideak he kariyakarte kitle tras kaddtat nhoim?
Simao: Oi Tadev. Ami amcho soglo tenko ani ghoddta to sohokar tankam diunk favo kiteak te aplea faideak hem kam korinant punn sogleanchea boreponna khatir te vaurtat.
Tadev: Sorkar aplea montriank ani amdarank ani tech porim poixekarank faideak poddta tosle nirnnoi ghetat ani sogle tras amkam sonsche poddtat.
Simao: Sarkem tujem. Zorui bore bhaxen loka thaim basabhas korun nirnnoi ghetlear oslem odruxtt amcher ieunchem nam.
Tadev: Sogleanim fuddem sorun, eka-mekachea adaran porjek zai tench ghoddon ieunk pavlam marunk ekdom gorjechem.
Simao: Hakach lagon hanv te zomatik vetam mhozo tenko diunk. Mhoje lagim kainch zainam mhonn ghorant bosun ravlear, boreponn koxem ietolem?
Tadev: “Mhaka kiteak poddlam, dusro kortolo”, hem amchem doronn soddun diunk goroz.
Simao: Oi Tadev, oxench zaum. Borem vetam hanv, ‘Bus’ Chukteli.
Tadev: Boro Korun Voch.
-Felix Dias