Tadev:  Simao Titiv, Dev Boro dis dium. Tum hea vellar khoim gel’lo ani hi poti kosli?

Simao:  Dev tuka kurpa dium Tadev.  Ek rajki pokxache monis saman vanttale dekun hanvuim tem           saman he potient gheun ailam.

Tadev: ‘Covid’ piddek lagun zaiteo sonvstha lokak jevonn ani gorjecheo vostu haddun ditale. Hem         kam atam he pokx korunk lagleat kitem?

Simao: Hem saman he piddek lagun nhoim, punn anink thoddeach mhoineanim venchnuko      zauncheo asat, taka lagun hi-ek lokak khoxal korpachi ievzonn.

Tadev:  Hanvem aikolam, thodde zann poixe legit vanttunk lagleat munn.

Simao:  Oi, oxem hanvem aikolam. Hi pottli hanvem ugddunk nam, ghoddie noxib aslear, mhaka              tantunt poixe ghoddie mellot.

Tadev: Toxem zalear, venchnuko zatat tednam tumvem tujem mot, heach pokxhachea umedvar-ak     ghalchem poddlem?

Simao:  Mot zaun asa povitr ani tem konnacheanuch viktem gheunk zainam. He pokxache monis              lokak he porim duddu ani vostu diun fottounk sodtat. Eke bhaxen te lokak lonch ditat. Hanv      mhojem mot chintun ani niallun, borea teach umedvar-ak ditolom.

Tadev: Sarkem tujem titiv. Amkam xikpant legun mellta ki dor ek mot gupit ani konnachean       dusreancher boll korunk zainam.

Simao: Atanchea kallar heo venchnuko mhollear ek dondho-so zaun gheleat.

Tadev: Tum oxem kiteak mhonntai?

Simao:  Zannaim Tadev, adle umedvar imandaren soglem kortale ani porjechea boreponnank    vaurtale. Punn atam sogle svarti, fokot aploch faido polletat. Aiz ek pokx, zalear faleam       dusrea pokxant uddki martat.

Tadev:  Toxem zalear hem saman haddun tunvem borem kelem.

Simao: Aplo koxttancho konnuch poiso khorchunk vochonam. Lonch vo ier vaitt kornio korun     ektthaim kelolo poiso tho. Tankam bud xikounk ho ek upai mhonn hanvem tanchem saman             haddlem.

Tadev: Venchnuko lagim pavtam-pavtam dusre ietele.

Simao: Oi, sogleanchem mevta tem gheupachem punn mot fokot tuka zai tea borea umedvar-ak diun   ek boro Serkar haddunk ami proitn korunk bhov gorjechem.

Tadev: Oxem korun amcho fuddar boro zaunk pavtolo.

Simao: Sarkem tujem. Borem tor vetam hanv. Mog asum-di.

Tadev: Borem Titiv. Fuddle pavtt mellchem.

-Felix Dias