Tadev:  Dev boro dis dium Simao. Titiv.Tuzo sobhav aiz chintest-so dista.Kitem zalam tor?

Simao:  Baba Tadev mhozo sobhav,Marsachi 10 tarikh padun chintest astolo.Mhojea sarke Goenchem borem dekhli,halinch zal’lea venchnnukancho nikal eit-sor,amkam xanti aschinam.

Tadev:  Somzolom tujem.Punn titiv,nikal jahir korunk itle dis kiteak lagtat? Venchnnuko Febrerache 14 ver zal’leo nhoim?

Simao:  Oi, zal’leo,punn Goenche sangata dusreai Prantanim venchnnuko chalu asat Ani sogleo somptokuch,nemam pormonnem nikal sangatim diuncho poddtta.

Tadev:  Tor tum chintest kiteak asai titiv?Nikal etokoch thavem zatelem konn jikla anim konn harla to.

Simao:  Nikal lagosor,ek bhirant asta,bore amdar nivddun iena zait mhonn.Amkam ek boro Ani niticho Sorkar mellonk tancheruch dhorlolem asa nhoim?

Tadev:  Sarkem tujem.Konn,konnank mot ghalta tem kainch kollonam,kiteak sogleank guptim mot ghalchem asta.

Simao:  Titlench nhoim atam ek dusrem,novem duens koxem bhitor sorlam.

Tadev:  Duens?Ani koslem? Tum Corona-chi khobor kortai kitem?

Simao:  Nam,tem Duens nhoim.Nivddun ietokuch,hea pokxant than dusrea pokxant uddki marpachem,zoxem ami pattle pavtt pollelam.Loz nastanam,konnakuch vicharinastanam,dusrea pokxant gustat,aplea borepomnam khatir.Motdarank valoruch nam punn venchnnuke adim ami ‘MOTDAR RAZA’.

Tadev:  Hem oxem adim than chaluch assa titiv? Kitli vaitt tanchi vagnnuk.

Simao:  Nam,adim oxem ghoddonaslem.Atam rajkaronn ek dhondo koso zala,konn chodd Dita te vatten vhoddli mirvonnuk-xi vochunk lagta.

Tadev:  Hem oxem ghoddonam zaunk,nem-kaide bodlun anink ghott korunk gorjechem

Simao:  Tum Sarkem uloilo,punn tem konn kortolo? Sogleankuch axen vengoileant.Podvechi anim duddvanchi as laglea.Tunvem ti mhon’nim aikolea nhoim? HANV RODDTTAM MHOJEA DESAK ANI DES RODDTTA MHOJEA BHESAK.Oslich amchi doxea zaun poddlea.Chintest zaunk hench tem karann.

Tadev:  Hi mhon’nim tuka sarkich lagta,titiv.Goenchea borea passot tum uske kaddit asai.Punn ek sang titiv,boreponn eunk kitem gorjechem?

Simao:  Zannaim Tadev,venchnnukecho nikal ietokuch khoinchei tori eka pokxak bahumat(majority)mellonk bhov gorjechem Sorkar ghoddon eunk.Oxem zainam zalear novea amdaranchem ghirghirem suru zata.Konn konnank khoinche vatten voddun bhorta tem konnakuch khobor asonam.

Tadev:  Amchea Goeant Sorkar ghoddon eunk kitlea amdaranchi goroz asta?

Simao:  Goa Vidhan Sabha zaun asa 40 amdaranchi. Mhonnttoch bahumat mellonk 21 amdaranchi goroz,Sorkar ghoddun addunk

Tadev: Tuzoch pokx jikun ailear puro

Simao:  Bore tech amdar amkam favo kor ami fuddlim panch vorsam amkam ek boro,broxttachar naslolo Ani lokachea boreponnam khatir vaurtolo Sorkar favo zaunk HANV Deva lagim bhorvanxean magot asam.

Tadev:  Oi,ami Devak prarthonam ubarun amcho  fuddar boro zaunk magumia.

Simao: Borem tor,vetam hanv,thoddeach disanim nikal ietokuch mellchem.

Tadev:  Marsachi 10tarikh,amkam Goenkarank bhov khoxechi zalear puro. Borem adeus..mog asumdi!!

Felix Dias