Tadev: Dev boro dis dium,Simao Titiv
Simao: Tukai dium Baba Tadev.Tumchio atam suttio suru zaleo nhoim? Movza tumchi..tumkam porot movjeche dis aile.
Tadev: Oi,Titiv,ami suttient asanv anim Iskolam porot Jun-achea mhoimeant suru zatelim mhonntoch zaito kall amchean movjen sarum ieta.
Simao: Tumcho Vell kosleai borea kamant vapor korat,zoxem xibir vo khella mollar.
Tadev: Hanvem toxench korunk ievjilam..Prachit kall Ani Paskanchi porob bori zali nhoim?
Simao: Oi,hea vorsa soglem borem zalem.Devan amcher besanv ghatlem.Covid-19 he piddek lagon bhirant asli ti pois zali Ani soglem bore bhaxen zaunk amkam Devanuch nirmilem,hatunt il’loi dubhav nam.
Tadev: Amche Firgojent Ani dusreai Firgozanim zaito lok,soglea kariavollinim bhag gheunk ailo tem polleun borem dislem. Bhurgim,tornattim Ani zannttim umedin ailim,nhoim?
Simao: Oxench zaunk zai,Dev amcher besanv ghaltolo.Punn ek vost ami azunuim sudraunk sodinanv.
Tadev: Kosli vost sudronk nam,Titiv?
Simao: Zaitim bhavam-bhoinnam,Igorjent bhitor sortanam,fuddem suat aslear passun,fuddem vochonant punn fattlean ravtat Ani fattli boska ghetat nam tor dhara lagim ghordi kortat.Thoddim zannam suvat asunuim dhara bhair passun ravtat.
Tadev: Uprant huxir aileleank suvat sogli bhorlea-xi dista nhoim?
Simao: Oi,bexttoch duspott zata
Tadev: Punn amchim Firgoz Sobhechim vangddi tankam suvat dakhounk astat nhoim? Tim chukoinastanam ‘Sanitizer’ anim goroz tankam ‘mask’ passun diun,apli seva bhettoitat,tem ami pollelam
Simao: Tim babddim astat,punn thoddim tanchem aikonant.Kaim zannam tankam opman passun kortat
Tadev: Hem vaitt..oxem korun Tim apunn Devachea mondirant asat mhonn visortat.
Simao: Thodde pavtt dhara lagim anim dhara bhair asleleank polloun,pattim huxir aileleank dista bhitor suvat nam mhonn anim Tim porot passun vetat.
Tadev: Hem sarkem tujem Titiv.Amcho ek ixtt tench sango.Tannem dhara bhair zaito lok pollelo Ani suvat mellchi nam mhonn somzon to porot ghelo Ani dusre Firgojent ghelo.
Simao: Soglem bore manddavollin zaunchem mhonn Amche Iadnik bhav,Firgoz Sobheche anim ier Zomeanche vangddi bharim thokos gheun vavurtat.
Tadev: Sogleanim sohokar dilear amchio soglio kariavolli odik borio zaum ietat.Soglea bhavam-bhoinnamim ek ghorabo koso bhag gheunk chodd mhotvachem.
Simao: Oxench zalear puro mhonn ami Devak ulo korumia.Soglim khuxal zatelim anim sogleank xantin Ani bore mannsugen hea kariavollinim bhag gheunk sompem zatolem..
Tadev: Borem Titiv,hanv vetam,kaim gorjecheo vostu gheunk zai.
Simao: Boro korun voch,hanvuim bazarant vetam.