Tadev: Dev boro dis dium, Simao Titiv. Sogloch umedin bhorlolo-so dista. Kitem zalam tor?
Simao: Dev tuka kurpa dium, Tadev bab. Oi, hea disamnim ekdom ghormi vaddlea, toxi mhoji umed-ui vaddlea. Venchnnuko zaunchio asat taka lagon soglleamnim urbha dahounk goroz.
Tadev: Oxem tum kiteak mhonnttai Titiv?
Simao: Thoddeach disamnim amchea Goiant venchnnuko zatleo ani uprant eka mhoinea modem nikal jahir zaun, ek khasdar nivddun ietolo. Hem soglem ghoddon ieunk soglea nagrikank ap-aplo hok’k asa, to ami amchem mot diun rakhtanv. Mai-ache Sat (7) tarker heo venchnnuko zatleo
Tadev:Oi Titiv, ho hok’k amkam amchem sanvidhan (Constitution) dor eka ottra vorsam bhorleant taka favo korta, oxem amkam xikoilam.
Simao: Oi, sarkem tujem. Nikal jahir zai porian amchi umed amkam uskaita, amkam zai toslo boro umedvar nivddun ieunk sogleank ek vhodd axa asta.
Tadev: Jikun ietokoch, ho amdar vo khasdar, panch vorsam amcho protinidhi zata.
Simao: Tannim hea panch vorsamnim, lokachea boreponna khatir vavrunk zai ani apleponn visronk zai. Zaite pavtt oxem ghoddonam ani hakach lagon zaitim amchim bhavam-bhoinnam motdan korunk vocho nant-ghorant boson sut’ti ghetat.
Tadev: Oxem korun, boltoch umedvar nivddun ieunk xokta, nhoim titiv?
Simao: Oxench ghoddta ani amkam sonschem poddta. Amcho protinidhi koso vaurche boldek apleach boreponna khatir te pavlam martat.
Tadev: Hem tanchem sarkem nam.
Simao: Itlench nhoim atam anink ek vaitt ailam. Apleak nivddun ditolea motdarank vicharinastanam aploch faido polleun, dusrea pokxant proves kortat.
Tadev: Hem fottingponn nhoim Titiv?.
Simao: Oi Baba, Deva mukhar soput pasun gheun, todde Devak pasun fottoitat ani soput visortat. Hakach lagun hanv mhonntalom – nikal ie porian amkam umed ani uprant jikteleachi umed.
Tadev: Atam somzolom hanv. Mhaka mot ghalunk mellonam kiteak mhaka ottra vorsam zaunk nant, punn hem sarkem chukichem.
Simao: Oxem te chintinant. punn soglleanchi Dev zot’ti ghetolo, hantunt dubhav nam. Atanche venchnnukent tori boro umedvar favo kor mhunn hanv Devak magnnem kortam.
Tadev: Sogleanim fuddem sorun Mai-ache sat (7) tarker boro toch umedvar vinchun kaddlear puro Titiv.
Simao: Oxench Zaum. Borem tor vetam hanv. Zomatik vochunk zai. Tum boro korun voch.
Felix Dias