Simao: Baba Tadev, Devache kurpen bhorlolo dis tuka anvddetam.
Tadev: Tukai anvddetam, Titiv. Mhaka eka proxnnacho zobab zai.
Simao: Proxnn? ani koslo? tum sogloch guspola – so?
Tadev: Girestkai-echi axa korop vaitt?
Simao: Soroll utramnim sangchem zalear, ‘Nam’. Punn girestkaiek bhulon, Devak visorxhi zalear, tem vaitt. Zaitim zannam girestkaiek Dev kortat.
Tadev: Duddvanchi axa, soglea vaittanchem mull, oxem kiteak mhonttat tor?
Simao: Polle Tadev. Jim girest zaunk sodtat, tim tallnnek, vo nuksann haddtat toslea kornneank sampoddtat.
Tadev: Oi, oxem ghoddom ieta.
Simao: Zaitim zannam osli axa dhorun, mull bhavarta thaun pois vetat. Devacher visor ghaltat. Hench tem mull, zache vorvim tujer sogle koxtt-dogd ieunk xoktat.
Tadev: Amkam sogllem Devuch favo korta, nhoim?
Simao: Oi, Tadev, tuvem sarkem sanglem. Jevunk –khaunk, nhesunk- pangrunk ani ravunk asro Dev amkam dita, tantun ami khuxal jivit sarunk zai.
Tadev: Kosli-i vost kortanam promannikponnan ani Devak manta tosli korunk ekdom gorjechem, nhoim Titiv?
Simao: Bhavart, bhoktiponn ani promannikponn bhov molhache sugunn, hem sodanch monant dovor.
Tadev: Devak poilo ani vhoilo zago sodanch diunk gorjechem.
Simao: Oi Tadev. Amkam hache vorvim sasnnachem jivit jerul mellom ieta.
Tadev: Osle vagnnukentlean ami amkam, Sorginchea Rajeant theve ektthaim kortanv, nhoim Titiv?
Simao: Oi, Tadev, tum atam sarkem somzoloi. Amkam Devan dilam, titlean ami khoxal asunk goroz. Sonvsarant ietanam ami kainch haddunk nam, tech porim vetanam ami kainch vhorunk xokonanv.
Tadev: Vetanam amcheo boreo kornnio amkam bhov faideacheo zatoleo, nhoi Titiv?
Simao: Jerul, hantunt il’loi dubhov nam. Bhavartan amchem jivit sarunk vavrum-ia. Dudvanchi ani girestkaiechi axa pois dovrum-ia ani sadeponnan ani boreponnan amchem jivit sarunk proitn korum-ia.
Tadev: Titiv, kai bore vichar tuje. soglem bore bhaxen somzaun sanglem dekun tuka Dev borem korum.
Simao: Dev tujer axirvad ghalum. Borem vetam, hanv, mog asumdi.

-Felix Dias