Tadev: Dev boro dis dium, Simao Titiv. Aiz sokallim fuddem khoim vochunk bhair sorlai?

Simao: Dev tuka kurpa dium, Tadev. Amchea Ward-achea protinidik mellunk vetam, mhojem nanv borounk.

Tadev: Nanv borounk ?Anink kiteak Titiv?

Simao: Fuddlea mhoineant, 13ver Otubrache -san, Saininnichi Murti bhair sorchi asa, dhor eka ghorabeak bhett korunk. Zankam hi bhett svikar korchi asa tannim aplem nanv aplea protinidhi lagim diunk zai.

Tadev: Oi Titiv, ami kalchea disa amchem nanv boroun ghetlam.

Simao: Hea vorsa hi bhett chodda umedin zaunk zai, karann pattlim Don vorsam, COVID piddek lagun hi bhett gupit anim eksurponnachi koxi distali kiteak choddso lok eka-mekager vochonaslo.

Tadev: Fokot ghorantlinch monxam he bhetteche kariavollint bhag ghetalim,nhoim Titiv?

Simao: Oi baba, punn tum zannaim Tadev kaim vorsam pattim, hi Saininnichi bhett zatanam vhoddlo somoromb anim ghonghonn zatalo to?

Tadev: Zaito lok ekttaim ietalo tor?

Simao:  Ganvcho soglo lok eka-mekachea ghora kuxalkaien vantto gheunk vetalim.Jednam poilea disa hi Murti Igorjent thaun bhair sortali, tednam Rosteancher bonderam ghalum roste nettoitaleanv anim fogetti marun ghonnghonnan pursanv-ant vantto ghetaleanv.

Tadev: Atam hem dixtti poddonam. Titiv tednam bhurgeank anim hajir asleleank zaitem khaunk-pieunk melltalem?

Simao: Tea kallar ukoddlole chonne vo kosli ek vo don vostu khaunk ditalint.

Tadev: Punn atam zaitem ditat nhoim?

Simao: Oi, atam amche modem ek spordha (competition) koxem dista. Dusro dita tache von hanv chodd diunk sodtam. Zanche lagim ghoddtta tim kortat, punn ghoddonam tanchem kitem?

Tadev: Sarkem tujem Titiv. Magnneachea monan he bhettent bhag ghevop chodd gorjechem anim nhoim amkam kitem khaunk-pieunk melltolem tem.

Simao: Oi Tadev hi bhett zatanam hench amchem mon zaunk zai. Eka mekachea pasot magun,mog        Ani xanti vistarunk amchim prarthonam Devak ubarunk goroz. Ami lhan astanam, ghorant Saibinn ieta tednam, gorchim don vo tin ters rozar kortalim. Tea bhair soglim Igorjent vochun misant bhag ghetalim

Tadev: Saibinn Main amkam Tersachem magnnem xikoilam tem ami bore toren korunk bhov gorjechem.

Simao: Xabas Tadev. Tujea sarkea bhurgeanim oslem mon dakoilem zalear, tancher dubava vhiret, Saibinnichim anim Devachim besavam denvun ietolim.

Tadev: Hea vorsa, amche Saibinniche Murticho foll amkam sogleank favo zalear puro mhonn Deva  lagim  magumia.

Simao: Borem tor, Tadev amchea ghora Saibinnichi bhett zatanam amgher ieunk visronaka.

Tadev: Borem Titiv,atam vetam hanv.

-Felix Dias