Simao: Dev boro dis dium Tadev. Saikol gheun khoim vetai?
Tadev: Dev tuka kurpa dium Simao Titiv.Bazarant vetam, thoddim pustokam gheunk  zai.
Simao: Saikol sintidan choloi, aiz kal kitlexech obsoeg zalele amim polletanv.
Tadev: Oi Titiv. Mottoram rosteancher koxei toren choloitat, xist mhonnleli mat punn nam.
Simao: Tum kitloi bore toren choloilear passun, tuka dusreanim uddoilole obsoeg atam chodd zaleat.
Tadev: Oxe toren,te apunn dusreanche jiv sonkoxttant ghaltat mhonn mat tori chintinant.
Simao: Ek mottor cholovpi aplo Ani aplea mottorant aslelea lokancho jiv trasant ghalta.
Tadev: Rosteancher vhoddle-vhoddle fondd poddleat, tankaim lagun obsoeg vaddleat.
Simao: Obsoeg ghoddonk anink ek vhoddlem karann mhollear,soro pieun mottor cholovop.
Tadev: Sarkem tujem,hem Sarkem bond zaunk zai.Sorkaran hacher khor kaide ghalunk zai.
Simao: Chintlear vaitt dista.Pieun-pieun tum movza marta anim uprant mottor cholovun,dusreanche obsoegan jiv kaddta.
Tadev: Gel’lea mhoineant zaite marekar obsoeg ghoddle anim tancho ugddas kelear ang xirxirta.
Simao: Mhaka dista Zuari Pulacher,Cortalim,zo obsoeg ghoddlo, to ekdomuch marekar zalo
Tadev: Oi Titiv. Char zannancho jiv kobar zalo,,eka khinna bhitor nanch zalim
Simao: Pulisen sanglam tea pormonnem ho obsoeg soro pieun Ani chodd nettan Pulacher mottor cholovun,ho obsoeg ghoddlo.
Tadev: Tea vellar thoim Pulacher anink konn naslo,nam zalear anink zaite zann kobar zaupache.
Simao: Devan tankam anim ieram obsoegant sompun gheloleank sorginchi xanti favo korum.
Tadev: Rosteancher ami bori xist samballunk zai, nam tor hem chaluch urtolem.Borem vetam hanv, Vell zata
Simao: Boro korun voch

-Felix Dias