Gonvlleacho Sondex – May 2022

Mogall Firgozkaramno,

Sonvsarant ghoddtoleam godditamnim monisponnachem vhoddponn ani kirkollponn odik ani odik disun ieta. Jitlo monis noveo ani vhoddleo vostu sodun kaddta ani ghoddun haddta, titlo to osokt mhonn dakhoita.

Mon’xachem vhoddponn sonvsarache rochnnekuch thaun mellta. (Ut.1/27). Devan Aplea sarkeacho mon’xak rochlo, Devachea sarkeacho taka rochlo, dadlo ani bhail tankam rochlim. Mon’xachem  kitlem vhoddponn. Devan taka Aplea sarkho rochunk. Punn dusre vatten, mon’xak rochlo mhonn koslo rochlo? Sarkho osokt. (Ut.1/7). Tednam Sorvespora Devan zomniveli mati gheun mon’xak kelo ani Tannem tachea nakachea puddamnim jivitacho SVAS ghalo ani oso monis ek jivo pranni zalo. Tednam thaun monis hem osokt jivit jieit aila.

Fattlea pon’nas (50) tem satt (60) vorsam bhitor sonvsarant itlem sudarop zalam ani grestkai vaddlea ki monis apunn Deva vinnem jieunk sodta. Zaite pautt Dev legun nanch mhonnta. Devachi goroz legun nam oxem dakhoita. Punn hem sogllem chukichem mhonn dor ekleacho onnbhov dakhoita.

Fattlea vorsa heach Mai-achea mhoineachea disamnim vollvolliancho ugddas ieta. Corona virusak lagun akhe Indiek kitlo sogott lok ixeob nastanam melo. Bore danddge, bolaiki aslole, grest toxe gorib, xiklole toxe nennar morun ghele. Sadho virusak lagun, vokod nam zaun, suskar gheunk takot nam zaun mellot thoim mele. Ti bhirant ani morun gheloleanchem dukh azun sorun vochunk nam. Hem dakhoita  mon’xachi osoktai. (Stotram.104/29). Tum tondd mat dhamp, tim gabortat; Tum prann mat kadd, tim morun dhullint portotat. Somzunk kitlem mhonn sadhem ani sarkhem.  (Stotram.144/4). Mon’xacho jiv mhollear vareachi funk, tache dis savlle vori nanch zatat.

Monis kirkoll asun-ui Devan mon’xak rochlolea vhoddponnak vhoir uklunk Jezu Apunnuch amche pasot morta ani punorjivont zata. Jezu khorench melo mhonn dakhounk Taka zomnichea fonddant purtat. Punn Jezu tantuntlo bhair sorun apleak odik podvi asa mhonn dakhoita. Apleak ek novem ani sorv-podven bhorlolem deivik jivit asa mhonn kollit korta. Hench uncha molachem jivit amkam-i Jezun dilem. (Zu.20/22) Oxem uloun, Tannem tancher SVAS soddlo ani tankam mhollem: “Povitr Atmo gheiat”. Itlean Jezun Apli podvi xisank vanttun dili.

Jitlim mon’xam vhodd, tilinch tim kirkoll. Tonddak ani nakak dambun ek vo don minot bond korun dovorlear jiv voita. Tea pasot mon’xallem jivit jietanam odik apleachi ani dusreanchi kallji gheun jieunk ugddas korum-ia. Fattlea vorsa morun gheloleancho ugddas korum-ia. Goroz tankam bhuzvonn dium-ia. Jivitachem mol ollkhun gheum-ia. Askar ani suskar ghetanam Devachem udarponn vakhannum-ia.

Soglleank tumkam kuxalbhorit Mai mhoineant visov ani sutteo anvddetam.

Tumcho Padr Vigar
Fr. Andrew Pereira