Tadev: Simao Titiv, boro nesson, hea vellar khoim vochonk bhair sorlai?
Simao: Amchea soireachem kazar asa dekun ‘hall’-ant vetam Tadev.
Tadev: Hea disamnim zaitim kazaram, festam ani ier somoromb zatat, nhoim?
Simao: Oi, Covid piddek lagon soglem bond aslolem tem atam sovkas suru zalam ani amkam he somoromb korunk sompem zalam.
Tadev: Devache upkar attounk goroz, kiteak kitle-xech bhav-bhoinnank tras ani uske sonsunk poddle. Thoddeanche adim fuddem poixe farir kelole passun, portun mellonk nant.
Simao: Ugddas kelear roddonk ieta, punn Devacho ghutt Devuch zannam.
Tadev: Thodde dis adim hanvuim eka kazarak gelolom Titiv. Zaito lok hajir aslo ani zaitem pivonn ani jevonn aslem, anim soglim dhados zalim. Punn ek mat mhaka borem lagunk nam.
Simao: Kitem borem lagunk nam Tadev?
Tadev: Zaitem jevonn urlolem hanvem pollelem ani thoddeanim jevnnacho idvas pasun kelo. Zonn eklean apnnak zai titlench jevonn ‘plate’-in gheunk goroz nhoim Titiv
Simao: Sarkem tujem. Aiz-kal kitlo lok jevonn nastanam upaxim asta ani ami jevnnacho durupeog kortanv tem Devak pasun mandchem nam.
Tadev: Kitlo korch korun somorombh kortanv, punn oxem zatoch vaitt dista ani dukh bogta.
Simao: Haka ek upai koso eke sonvsthen ‘Food Bank’ suru kelea mhunn hanvem vachlam. Dokshin Goenche Pulis tankam aplo tenko diunk raji zaleat.
Tadev: Ekdom bori ievzonn. Punn hem koxem vevharant ghaltat khoim?
Simao: Pulis Chovker, “Refrigerator” dovorlole asat. Zai tannim tem chodd aslelem jevonn vhorun thoim dium ieta. Tem Fridge-intlem jevonn uprant te sonvstheche monis voron, goribank ditat.
Tadev: Kai bori, thoknnai korpa sarki ievzonn. Jevnnacho boro upeog zalo ani jevonn nasloleanchem pottui bhorlem.
Simao: Oi, tancher sogleancher Devacho axirvad poddom mhonn magtam. Sogleanim tenko duink goroz.
Tadev: Jerul poddtolo. Hi ievzonn akhea Goeant vevharant ghalun ti bori iesvont zalear puro.
Simao: Oxench zaum ani soglleank tem faideachem zaum. Borem tor, vetam hanv. Kazar vellar zalear puro.
Tadev: Borem Titiv. Tuzo vell movjen sar.
Felix Dias