Jivit Devachem, dennem funkeachem,
Korunk tachem zaumchem na mol.
Dev jivit hanv ghetam, sobitayen nettoitam,
Kednach zaunk diumchem nhoi pol.
Hem jivit taka mevlem, fulanim nettoilem,
Soddun aplo ganv ani ghor,
Francis tachem nanv, Assisi tacho ganv,
Povitr sobhent ruchichem foll.

Girest ghorabeacho, put apurbayecho,
Ikraixim oixim ek vorsa, zolmant to ailo.
Mogan taka vaddoilo, pun patkant revoddlo,
Ragest tornatto mhonn, somaz ollkhotalo.

Soinik zatolo, dusmanak haraitolo,
Zaun aslem tachem sopon.
Gerak to veta, dusman taka dhorta,
Favo taka kortat bondkhondd.
Ek voros thoi to sarta, dukh ani koxtt bhogta,
Pun Dev ieta korunk tachi sod.
Suttka taka mevta, assient porot ieta,
Koxem jivit bodolta poi.

Girestkai apli vantta, vingllo bhes to gheta,
Kaklutsar to zata, pelea mogan borta.
Koddkarank vengoita, umo tancho gheta,
Krista pori seva korunk fuddem sorta.

Ghorcheank fatti dovrun, aplo ganv to soddun,
Devacho to chakor zata.
Soimabchi sobitai, bhav-bhoinnicho ekchar,
Xristtint Devak polleta.
Franciscan sonsta ghoddun, magnnem upas korun,
Bhik magun aplem jivit sarta.
Sonsta achi vaddta, stigmata taka zata,
Jezuchea koxttant vantto gheta.

Tin Tarik Otombrachi, ghoddi tachea mornachi,
Dekh ami dovorli, borea jivitachi.
Pope Gregory novean, man dilo altaracho,
Patron taka nemlo, xristti zonavorancho.
Char Tarik Otombracho, Dis tache porbecho,
tuka noman amcho, Sant to Povitr Sobhecho.

-Fr.Leslie Gomes