Bhurgem ek bhorvanso
Mogall Firgozkaramno,Rabindranath Tagore oxem mhonnta, “Every child comes with a message that God is not yet discouraged of man.”

Setembrant Saibinnichea zolm disache porbek novena disamnim zaitea bhurgeanchea nimitan birthday-ak mhonn lok misam dita. Tea borobor bhurgeanchea hatantlean dusreank khaunk mhonn cake ani chocolates hancho misa uprant xinvor zata. Dista fokot heach disamnim bhurgeanche birthday zatat kai mhonn. Zatat zait, punn halinch te-ui bi unnem zait gheleat.

Maria (vo Saibinn Mai) aple avoiger tichea mhatar piraier zolmoli. Tichea zolman don vostu amkam ugddapeo keleo. Poilem mhollear Devachi podvi kednai dakoum ieta. Ani Dev apnnak zai tednam dakoita. Dusrem mhollear Saibinnichea zolman, tika Devache ieuzonnen ani amchea soddvonnechea vavrant bhag asa mhonn Dev tika zolmank haddta. Tea pasot Saibinnicho zolm amkam ekdom soglle vatten gorjecho.

Tech porim dor eka bhurgeachoi zolm Devache koxe pormannem ekdom gorjecho. Karann dor ek bhurgem fuddarak mukhar kitem ani konn zait mhonn konn nokllo.  Dekhik, David Razak anik vhoddle sat (7) bhav asle. Punn Devan nimanneak, Davidak apoun haddun vinchun kaddun Israelacho soglleam von vhodd raza kelo. Saibinn-mai eklich apurbaiechi dhuv, Punn Jezuchi avoi zaunk Devan tika vinchun kaddli. Hea baxen anik zaitim ojeapanchim udharonnam Povitr Pustokant melltat, zoim dor ek bhurgem itihasant apli zobabdari pallta.

Saibinnichea zolma somoiar anik ek uskeacho vixoi ugtto zata. Ani to mhollear zaiteam kuttumbamnim bhov thoddim bhurgim ani konnager zalear bhurginch zainant. Ho usko ani bhirant vaddot asa. Kuttumbanim bhurgim zolmo nam zaunk koslim karannam kai?Nennarponnan zalear mhojea monant thodde osle proxnn ietat.

1. Bhurgim amkam zai tednam zai kai?

2. Bhurgim amkam zai titlinch zai kai?

3. Bhurgim amkam zai toslinch zai kai?

4. Vhoilea proxnnak lagun kitem-kitem kortat kai?

Tumcho Padr Vigar
Fr. Andrew Pereira