Mogall Aquemchea firgozkaramno,
Aiz mhojem upkari kalliz dhinvasnnechem git gaita. Hea dhinvassnechea gitantlean Triek-Devak dhinvastam.
Ani heach gitantlean tumche sovem dhinvas attounk mhojem kalliz oddtta.
Junache Poiler, 2015 vorsa, mhojea ghorcheam sangata Bhagevont Sebastiao-che firgojent, Aquem hanvem mhojim panvlam marlim. Onolkhi koso tumche modem ailom. Chear vorsam tumche sangata ravlea uprant ghorcho koso zaun vetam. Hea chear vorsamnim gonvllik onnbhov ghetana poilim don vorsam Fr. Ligorinho D’Costa, Padrvigar koso mhaka meulo. Tache koddlean zaitem hanv xiklom. Jedna mhoji avoi piddent astana, tannem mhaka somzun ghetlo ani mhoje sovem boreponn dakhoilem. Hea tachea boreponna khatir Devak dhinvastam. Fattlim don vorsam amcho Padrvigar Fr. Andrew Pereira, ek bhav ani ek ixtt koso mhaka mel’lo. Ekach mezar bosun jevtastanam, aplo onnbhov sangtalo. Ani hanv chuktam tedna bori vatt dakhovpi ek bhav koso zalo. Ani aplea onbhovantlean mhaka girest korpi onnbhovan bhorlolo ek ixtt koso zalo. Tannem mhojea hatant zaiteo zobabdareo dil’leo. Dusrea utramnim mhakach Devachea mogan vaddunk ani xikunk to adaracho zalo. Hea soglea tachea boreponna khatir Fr. Andrew-k kallzant thaun dhinvastam. Ani he firgorjent odik nettan aplo Gonvllik vavr fuddem vhorunk Povitr Atmeachi xokti ani boll tankam magtam.
Mhoje kherit dhinvas dor eka Aquemchea kuttumba khatir. Tumche vorvim Jezucho mog hanvem onnbhovlo, ani Gonvllik onbhovan hanv girest zalom.
Amche firgojechea dor eke sonsthe vorvim, zaum ti Cofre committee, Pormoll Committee, Parish Pastoral Council, Catechetical Association, Youth Group, Legion of Mary, St. Sebastian Sports Club, St. Vincent de Paul, Divine Mercy group, Choir group, Liturgical Animators, Eucharistic Ministers ani mhoje apurbaieche Altar Servers. Tumche borobor vavrun mhaka zaiti khuxalkai bhogli. Devan tumcher aplo bhorpur axirvad ghalum.
Dor sonvara vedi-sevokanche zomatin Jezuchi seva korunk xikoitana, hanvui Devachea mogan vhaddlom ani tanche koddlean zaitem boreponn hanvem ghetlem. Devan tankam axirvadan bhorum ani bore toren xikunk Devan tankam zannvai dium. Dor disa Jezu bhaxen zaunk tim vavrum.
St. Joseph Convent-ache Madr bhoinnank tanchea boreponna khatir Devak dhinvastam ani Devan tancher ani tanchea vavracher ani iskolacher Devacho axirvad magtam.
Amche firgojent vavr kortolea ani korun gel’lea amchea bhavam-bhoinnank, tanche borobor vavr korun zaiti khuxalkai bhogli. Tanche borobor vavr kortastanam, goddie zaite pavtti voir-sokol zalam astelem, tanchea borea vavra khatir Devak dhinvastam ani Devan sogleank tankam bore bolaiken samballchim mhonn magtam.
Amchea Firgojechea iskolant vavr kortolea Administrator ani staff hannim, aplo adhar ani sohokar mhaka dila. Devan tancher ani iskolant xiktolea dor eka bhurgeacher Devachem besanv magtam.
Tumchea modlea zaitea zannamnim, tumchea ghorant somorombh astalo tedna tumi amcho ugddass korun jevonn pattoilem ani hanv boro jevlom. Hea tumchea udarponna ani uskea khatir tumcher Devan aplo bhorpur axirvad ghalum.
Him chear vorsam tumche borobor jietanam, Devacho mog tumkam diunk vavurlom. Punn hem korta astanam monis koso hanv chuklam astolom. Mhojea utramnim vo kornianim hanvem tumkam dukhoileant zalear tumche lagim bhogsonnem magtam.
Tumkam sogleank mhojem magnnem bhasaitam ani tech borobor mhoje pasot tumi magchem munn magtam.
Devan tumcher sogleancher axirvad ghalum. Devan tumkam rakhum ani samballum. Bhagevont Sebastiao-che vinovnen, Devan tumche veli pest-pidda pois korum ani bore bolaiken tumkam samballum.
Dev borem korum! mog asum-di!!
Fr. Gregorio Cruz
Padr-Kur