Mogall Firgozkaramno,

Mon’xank jivim marun, tankam uzo ghalun, tancho gobor kelo mhonn fattleam mhoineanim thoddeo khobro aikunk meuleo. Eke vatten soglli dukh ani dusre vatten mon’xanchi dharunnai polloun ojap dista. Mon’xak atam dusreanchi ani Devachi legun bhirantui nam ani churchure-i nam. Oslea vatavoronnant mon sogllem guspota ani fuddlem pavl khoim ghalchem tem kainch somzonam.

Oprad adarlea uprant mon’xak (cheddeak vo cheddvak) lhasouncho hatunt zaito liplolo ghutt asa. Mon’xak lhasoilea uprant thoim kaim khunna (proofs/evidence) uronam zaunk oxem korop. Nam mhonn apleacher add govai diunk dovrop nam. Monis sogllo lhasun gobor zata ani ollkunk pasun mellonam. Fuddem kainch korunk nozo zata.

Gobor mhonntanch Gobrachea Budvaracho ugddas zalo. Prachit kall suru kortanam amchea kopolar gobor ghaltat. Ani orthaborit utram, ‘Mon’xa tum dull ani mati, he dull-matient porot vetoloi’ oxem mhonntat. Khorench, amchi soglleanchi dull ani mati zateli. Mornnachea thoddeam disam bhitor mon’xachi kudd, nhoim mhonn rup legun ollkhunk mellnam. Osli amchi soglleanchi goth zata. Jivim astanam kuddichi ani nazuk rupachi (beauty) kitli mhonn dasti ghetat. Punn melea uprant tench rup pollounk bhirant dista ani vitt ieta. Rupachi soglli suropai ani kuddichi soglli boddai matient virgollun veta. Uprant fokot fattlean urta tem mon’xan kelolem sogllem boreponn.

Prachitacho kall vo korezm amkam anik ek pautt  hoch voilo ugddas korta. Niktinch natalancho kall ani sogllea bovall ani Khanna pivnnantlim bhair sortanch ho dukhacho ani roddneacho avaz kanar poddta. Ho avaz amkam nittaier ani zagear dovrunk chodd faido zata. Dor ekleachea ontorskornn-achi  chovkoxi korunk anik ek pavtt ugddas korta.

Korezmache fuddle 40 dis soglleank odik faideache zaunche. Sogllim odik bhagevont zaunk nove ani bore proitn korche. Hebrev lok 40 vorsam vatt sodit oronneant bhonvlo. Bhuk ani tan tannim sonsli ani xevottak bhasailolea desant tim pavlim. Eka disa amkam-i ho bhasailolo xevott (sorg) favo zaum.

Tumcho Padr Vigar
Fr. Andrew D. Pereira