Mogall Firgozkaramno,
Dezembr mhoino suru zatanch thonddi vaddta ani Natalancho ugddas ieta ani sogllo lok toiarek lagta. Jezuchea zolmant akho sonvsar veg-vegllea karannak lagun kuxal zata.
Jezuchea zolma somoiar zaiteo vostu amkam niallunk melltat. Tantuntli ek mhollear, Jezuchea zolma adim ani Tachea zolmank lagun Marie-k ani Juzek, Jezuk gheun zaitem hanga-thoim bonvchem poddlem. Survatekuch, Juzek aplem nanv aplea ganv-ghora lavunk gorbest aslole Maria-k Nazareth thaun Bethlehem gheun ieuchem poddlem. Bethlehem tankam zago nam zaun tim hanga-thoim ghor sodit bonvlim. Bhov gorjechea vellar ekleanui tankam asro dilo nam. Tea pasot ganva bhair, dongrar, gorvam ghotteant tannim asro ghetlo ani Marie-n Jezuk zolm dilo. Nhesunk kaim nam zaun tannim Jezuk fallianim guttlaun khavnnent dovorlo.
Tea uprant Herod patxai ballkank marunk sodta mhonn Juze ani Maria, Jezuk gheun Egypt-ak pollun ghelim ani thoim zaito kall ravlim. Israel-ant Herod melo mhonn kollun ailea uprant tim dogaim Jezuk gheun porot Israel-ak ailim. Herod-ache suvater, Arkelav Judient raj choloita mhonn bhielo ani Galileia prantant Nazareth-ak ieun ravlo. Jezu lhan aslo to thoim zannvaien, piraien ani kurpen Deva ani mon’xam mukhar vaddot vetalo.
Adlea Korarant legun oxench zalem. Aplea ganvant dukall poddla mhonn Israel aplea sogllea putank gheun Deva-che ieuzonnem pormannem Juze fuddleant Egypt-ant pavlo. Tanchi sonsot uprant thoim Egypt-ant vaddli mhonn Pharaoh tankam pidda-pidd diunk laglo. Oslea karannak lagun Moses hachea fuddariponna khal ti porza bhasailolea Cana ganvant ieunk bhair sorli. Lamb vatt tanktanam zaitim vorsam Jordan desantlean bhonvun tim basailolea Cana ganvant pavlim. To legun dusreancho ganv Devan Hebrew lokak dilo.
All human stories are migration stories because everyone is a refugee from their own childhood. Oxem Mohsin Hamid mhonnta.
Adlea kallar thaun hem lokachem eka desant thaun dusrea desant vechem chaluch asa (Migration). Hea kallar zalear chodduch dixtti poddta. Europachea desamnim zaito lok ieun ravunk sodta. Eg. England, Germany, Holland, Switzerland, Italy, Greece, France, Spain, adi. Tech borobor kitlo lok Australia, New Zealand, Canada, USA veta. Afganistan, Bangladesh, Nepal, Africa, East Europeans, south Americans, adi. Sogllim aplo des padd poddla mhonn ganv soddun danvtat. Amchea Bharotant legun Bombay, Bangalore hanga akhea desacho lok dixtti poddta. Amchea Goy-ant mhonn kitem unnem asa? Soglle torecho lok hanga sust bonvta. Hem sogllem polloun ghoddie amchem rogot bhitor xizta.
Ho vhoilo sogllo lok apnnak zai mhonn nhoi, punn gorjek sampoddleant dekhun aplo ganv soddun pordexi zaleant. Aplo dispott’tto giras zoddunk hanga thoim vavr korunk tim sodtat. Konnak aplo ganv soddun dusrea ganvant vochunk borem dista? Tea pasot Pap Saib Francis oxem mhonnta, “Migrants and refugees are not pawns on the chess board of humanity.”
Hea natalam somoiar pordexi lokak ek doiall nodren pollounk proitn korum-ia. Tim sogllim borim mon’xam nhoim zait. Tea pasot ami tori tanche pasot borim zaum-ia.
Tumcho Padr Vigar,
Fr. Andrew Pereira