Tadev: Dev Boro dis dium, Simao Titiv. Sokallim-sokallim, vortoman-potr gheun, kosli mahiti vachtai? Kosli khobor ailea?
Simao: Tukai dium Tadev. Khobor ani kosli? Ailelea disa tench. Vachun – vachun vitt ailea.
Tadev: Kitem ailam tor, tuka itli vitt-xi aili?
Simao: Hea disamnim rajkarann amkam pixem laita. He amche fuddari asat te eka pokxant thaun, dusrea pokxant uddki marit asat ani amchim potram hi khobor vaddoun – vaddoun ek vhoddlo vag marlelea porim amkam vachunk ditat.
Tadev: Hem oxem kiteak ghoddta Titiv?
Simao: Fokot duddvanche axek lagon tanchi vagnnuk osli zata. Te ap-svarthi zaunk pavtat punn porjek boltench sangtat. Tankam khoim Goenchem ani porjechem boreponn zalelem zai!
Tadev: Sangtat ek, punn kortat vegllench.
Simao: Oi. He pavtt kitle-xech pokx rajki angnnant bhitor sorleat ani ek-eklo aplem pemprem vazoit asat.
Tadev: Hakach lagon, aiz eka pokxant aslole fuddari, thoddeach disamnim dusrea pokxache mukhi fuddari zaun aplo rong bodlit asat. Sogloch gondholl korun soddtat.
Simao: Osle fuddari ganvchea loka modem futt ghaltat, dusmankai vaddoitat. Te fokot aplem boreponn chintat.
Tadev: Tankanch lagun kitlim zhogddim zaunk pavtat ani xanti bigddunk ek karann zatat.
Simao: Ek fuddari dusrea fuddareacher arop ghalta ani ujeant petrol ghatlelea porim uprant tem gharannem vhaddot asta.
Tadev: Punn purave nastanam arop koxe ghalum ieta tor?
Simao: Purave asum vo nasum, hem tanchem ghirghirem chaluch urta ani amkam pixem laita. Te zhogoddtat ani amkam karann nastanam uchamboll kortat.
Tadev: Venchnuko zaunche adim, sogleamnim ekmonan boreponnachim panvlam marlear puro.
Simao: Sarkem tujem. Dor eka goenkara ani amchea mannkulea ‘GOA’ – xharachea borea pasot sogleam modem ekvott asunk bhov gorjechem. Oxem ghoddona zalear amcho fuddar sonkoxttant poddpachi bhirant asa. Amcher boltech raj choloitele.
Tadev: Soglem borem tench amkam favo zaunk, Deva lagim ami magum-ia.
Simao: Deva, Tunch amcho alaxiro. Amkam rakh ani samball. Borem tor, fuddle pavtt mellchem. Tuka ani tuje familik ek khuxalbhorit Novem Voros 2022 anvddetam.
Tadev: Tumkaim tench anvddetam. Felix Dias