Mogall Firgozkaramno,
Fattlim 25-30 vorsam zalim Goy-ant Otumbrachea mhoineant Missanv-acho (chodd korun poixe ekthaim korcho) vavr nettan cholta. Heam fattleam vorsamnim lok zaitoch poiso ekthaim korun pois-pois ganvamnim dhorma pasot lokak daddta. Lokachem zaitem udarponn ani sacrifis disun aileat. Eka kallar European lok amkam Indian ani Goy-chea lokak poixe daddttale. Atam Goy-cho lok dusreank poixeancho adhar daddtat. Ekdom khuxechi khobor.
Goy-ant don baxen missanvam pasot poixe ekthaim kortat. Ek sodanche baxen World Mission Sunday mhonn Otumbrachea nimannea aitara (24/10/2021). Fattlea vorsa November 2020, Rs. 1,40,000 World Mission hankam daddle. Dusrem asa tem August 15ver Daman (Goy-che Archdiocese hacho bhag) Mission mhonn tankam poixeancho adhar kortat. Fattle pautt 15/8/2021 disa Rs. 24,335 Daman Mission haka poixe daddle. Aquem ganvcho ani akhea Goy-cho lok he baxen udhar mhonn zaitem vhoddponn dista. Eka kallar Portuguese Goy-ant ieun amchea Goy-karam pasot xikxonn diunk iskolam ani edeo vhodd Igorzo bandun amkam dovorleo. Tannim khoinche poixe ekthaim korun haddle mhonn ami aiz pasun nokllom. Tanchem soglleanchem borem zaum. Tannim korun dovorlolem ami aiz pasun 450 odik vorsam vapurtanv ani enjoy kortanv. 450 vorsam mhollear zaito lamb kall to.
Sonvsarant chodd xem bego-beg bodlop zalam tem nimannea 50 vorsam bhitor. Ani tea pasot amkam sogllem fatta-fatt bodol’lolem zai. Hench ami bhavartache nodren legun pollelear hench amkam zai. Itihas pollelear Kristi dhorm porgott zaunk ekdom lamb kall soron ghelo. Dhormdutancho Itihas vachit zalear thoddeam panam (pages) bhitor zaitea vorsancho amkam itihas mellta. Tea pasot soglli dhorm porgottnni sodd-soddit zali kai dista. Punn nam. Taka zaito kall laglo. Dekhik- Bhagevont Paulu dhorm porgottchea adim tea, tea ganvam vochun ravtalo ani aplo vavr dhondo thoim staptalo ani lokachi ollokh zalea uprant Kristak porgott’ttalo. Zaite dhorm-porgottnnar ek pautt aplea ganv-ghorche bhair sorlear porot kednanch pavonasle. Oxe toren ho dhorm porgottnnecho vavr sovkasaien choltalo.
Ami Kristi lok aiz jem kitem kortat vo korinastanam dovortat tacho porinnam zaitea vorsam uprant dixtti poddtolo. Ami hea vorsa poixe daddle ani rokddoch lok khoinchean kristanv zalo oxem nhoim. Amchea koxttancho, magnneacho ani poixeancho foll zaitea vorsamnim amkam pollounk mellot vo nam tem fokt ekloch Dev zannam. Tea mhonnosor, jem kitem ami korunk zai ani amche lagim kitem korunk zata tem korit ravum-ia. Mon’xamchim kallzam ani monan bodlunk zai tim Dev apnnak zai tednam bodoltolo.
Hea vorsa World Mission Sunday 25th October 2021 disa aila. To ekuch dis ani aitar nhoim, punn dor disa Jezuk porgottcho usko, amcho usko zaum.
Tumcho Padr Vigar,
Fr. Andrew Pereira