Mogall Firgozkaramno,
Zaitea dhormik vavram modem, Missanv-acho vavr mhollear ek kherit sondhi ani kaido dor ek kristanv mon’xacho. Jezun Apunn sorgar choddun vechea poilim nimanni xikounn dili ti mhollear, “Mhonntoch vochun sogllea raxttrank Mhoje xis korat; Bapache, Putache ani Povitr Atmeache Nanvim tankam snan diat; ani Hanvem tumkam dileat teo soglleo adnia pallunk tankam xikoiat.(Mt.28/19-20). Osle he xikounnek lagun Igorzmat sobavanuch Missionar. Jezuk dusreank porgottcho ho kaido ani soeg dor ek Kristi mon’xacho.
Aplo missionar kaido pallunk itihasant sobar monis veg-veglle baxen vavurle ani zoitivont zale. Zaitea missionar mon’xam modem don mon’xam odik chodd fankarlim. Ek mhollear St. Theresa of Child Jesus (St. Therese of Lisieux, France) Tem Janer 2,1873 zolmolem ani ontorlem Sept 30,1897 (Canonization 1923). St. Therese bhurge 15 vorsamche piraier Cloistered Carmel Convent-ant bhitor sorlem. Jezuk sonvsarachea chearui konnxeanim porgott korche aple anvdde adim fuddench tannem chintun dovorlele. Convetant tori vhoddlim ojeapam tem kainch korunk pavunk nam. France Convent-ant thoddeo Madr bhoinnio tanchea sister Convent,Saigon (atam Ho Chi Minh City, Vietnam) daddpacheo asleo. Punn St. Therese piddent poddunk laglem ani tachi hi axa pois desamnim missionar vavr korunk vochpachi kednanch puri zaunk nam. Punn missionar vavra pasot magchem mat tannem bond korunk nam. Ani tem bhurge 24 vorsamche piraier ontorlem.
Anik ek mahan missionar mhollear St. Francis Xavier. Jezu pasot vhodd zaunchem ani kitem korchem mhollear tachea monantuch naslem. Punn St. Inas-an aplo onnbhov sangun Francis-ak sarkhoch Jezu vatten vhoddun vhelo. Ani Inas-a borobor Society of Jesus stapunk pavlo. King Joao III, Jesuit-ancho vavr polloun sontoslo ani aplea rajeanim (Bharot-ant, Goa) Kristi vavr korunk apovnnem kelem. Tharailolo monis piddent poddun Francis-ak Goeant ieunk sondhi mell’li. Ani te March 15, 1540 Rome-ak thaun bhair sorle ani May 6, 1542 Goeant don vorsam uprant pavle. Goeant vavr kelea uprant Ceylon, Molucca Islands, Banda Islands, Malay Peninsula, Japan hanga vavr korcho korun Francis-ak China vochpachi koxi asli. Punn vatto soglleo bond kel’lean vochunk mellunk nam.
St. Therese ani St. Francis hea tanchea dhorm porgottnechea chodd borea vavrak lagun tankam Patron Saints of Missions oxem mhonntat.
Tea bhair missionar vavra pasot aplea ganvant ravun tenko diunk 1818 vorsa, Lyons, France eke tornatte ostoren Pauline Marie Jericot hinnem Pontifical Society for Propagation of Faith mhonn fuddem stapunk survat dili. Tea kallar China ani USA hangach missionar vavra khobro tika asleo. Tea pasot tinnem aplea ghorchea Silk korchea karkanneant vavraddeam modem lhan-lhan zome kele ani tankam ghoddta te baxen sacrifis korun sumanak thodde poixe ekthaim korun missanv-achea vavra pasot diunk maglem. Pauline Marie Jericot apunn zaun missanv-achea ganvamnim kednanch pavunk nam. Punn ghora lagim ravun tinnem aplem apounnem ollkhun ghetlem.
Hea Otumbr mhoineant,’Mission Sunday,’ ieta tednam ami-i dor eklo missionar mhonn ollkhun gheum-ia. Amche lagim koxe toren missanv-a pasot vavrunk zata tem polloun fuddlem pavl marum-ia. Ghora lagim ravun vo missanv-achea ganvamni pois pois vochun Jezuk porgott korum-ia.
Tumcho Padr Vigar
Fr.Andrew Pereira