Simao : Baba Tadev, tuka Dev boro dis dium
Tadev : Tukai dium Simao Titiv
Simao : Tumkam hea disanim suttio dileat dekhun tumi khuxal asat nhoim?
Tadev : Oi, Titiv, porikxa somptokuch matxe visov gheunk borem dista
Simao : Hea disanim, sokallchea vellar tum Igorjent Misak ieta tem polloun borem dista
Tadev : Misak ghelear amkam faideachem mhunn hanv sodanch somzotam.
Simao : Xabaski tuka. Novembrache poiler Ani dusrer,sogleanim Misak vochunk zai . Tuka khobor asa nhoim?
Tadev : Khobor asa tor? Soglea Santam-Bhoktancho Ani soglea Otmeank bhettoilolo Dis ami pallttanv
Simao : Oi, Kai bori porampora amchi
Tadev : Titiv, Novembrache poiler ami fokot Altaracho man favo zalelea Santank man ditanv?
Simao : Nam Baba. Hea disa Amchea Santam-Bhoktank man ditanam, tanche modim amchim zaitim bhavam bhoinnam hea sounsarant astanam borem jivit jieun sompun gheleant Ani sorginchem sukh bhogtat punn Sant mhonn porgott zaunk nant,oslea bhavam bhoinnankui ami man ditanv
Tadev : Punn sorgar konn bhitor sorla, tem amkam kollonam, nhoim?
Simao : Sarkem tujem. Punn amchim magnnim nirfoll zainant.Hea Amchea bhavam bhoinnank him magnnim faideachim, kiteak melea uprant fokot dusreanim tanche khatir magunk zata
Tadev : Hakach lagon, amkam Novembrache dusrer, Misam bhettounk, Semiterint vochun magnnem korunk, goribank Ani konn nasloleank Adar korunk Ani ier boreo vostu korunk amkam ulo marlolo asa
Simao : Oi Baba, oxem korun Ami nhoinch Amchea meloleank sasnachi xanti mellunk Adar kortanv punn amkam zonn ekleak sorginchea rajeant theve ekttaim korun dovortanv.
Tadev : Simao Titiv, adim hea disa kaim accharancheo vostu kortalet, zoxe porim kavlleank jevonn,otmeachea nanvan follam Ani fulamche Vaz nanch korop, adi, oxem hanvem aikolam
Simao : Atam tem choddxem ghoddonam tem polloun jivak borem dista. Punn kaim ganvanim hi porompora chaluch asa ti sarki nopoit zaunk zai
Tadev : Dusreank ami vaitt dekh diunk favonam
Simao : Sarkem tujem. Devan amchim sogleanchim monam uzvaddaum mhunn ami magumia
Tadev : Oxemch zaum. Borem Titiv vetam hanv, Vell zata
Simao : Boro korun voch
-Felix Dias