Mogall Firgozkaramno,
Amchea Goy-ant zaitea attvech torechea sonvoim-am modem ghorchea vo xezarea cheddea-cheddva kazara adim ani uprant kitlench ulovpa sarkhem asa. Aikunk ani pollounk zaite pavtt attvench dista. Cheddo vo cheddum kazarache piraier lagim pavtanch zaitim vichartat. Kednam korta go cheddvak kazar? Soirik azun ieunk nam? Uprant soirik zali mhonn kanar poddlear rokddech fuddle proxnn, kednam dovorlam cheddeachem/ cheddvachem kazar? Kazar zaun don vo tin mhoine zata mhonnosor gorjecho proxnn ieta. Sunechi/cheddvachi novidade (bori khobor) kitem asa go mhonn maink vo sasumaink xezarim vicharunk suru kortat. Hem sogllem vicharlem mhonn kitem vaitt oxem nam. To ghoddie ek usko zait vo ganvchi ek sonvoim zait. Punn ganvchea vaddttolea cheddva vo cheddea sovem soglleank ek zobabdari asa mhonn kollun ieta. Eka kallar xezarchem bhurgem legun aplench bhurgem mhonn sogllinch chintalim. Khoim nhu te suvater dixtti poddlem zalear rokddench vichartalim, Kitem korta go hangasor eklench? Bhurgeanchea vaddpant sogllim sohobhageliponn dakhoitalim. Aiz ghoddie osleo sonvoim-io il’leo unnem zaleat. Vhicharlem zalear zaiteank rag ieta.
Dezembrant pavleanv mhonntoch hea disamnim Natalanchi toiari suru zali asteli. Natalam kallar ani somorombh-nnent Jezu-cho zolm mhollear soglleam-von poilem ani vhoilem asunk zai. Mon’xanche soddvonnent Jezucho zolm sarkho maz (centre) zaunk zai.
Ankvar Marie ani Juze borobor, Jezuchea zolmant zaiteam mon’xank sohobhageliponnan vanttto gheunk meulem. Ankvar Marie-chea avoi Ana ani bapui Joaquim, Marie-k bore mannsugen ani Dev bhirantin vaddoili. Elizabeth ani Zachariah hankam, gorje vellar Mariecho adar ani sangat meulo. Ganva bhair dongrar monzatin Marie-k ani Juzek aplea ghotteant svagot kelim. Apli khavoll dovorlole suvater ballok Jezuk nidunk dilem. Teg vidhvan pois thaun aile ani ballok Jezu meulea uprant tannim taka nomoskar kelo ani aplim dhanam bhettoilim.
Punn zaiteamnim meulolo soeg nakarlo. Dekhik Herod-an meulolo sondex gheun bhirantin bhorlo ani ballok Jezuk jivexim marunk toiari keli. Kitlea sogott khannavollikar aplech bhitor poixe korchea uskean urle ani Marie-Juzek pois kelim. Zaito on-ollki lok tanchea borobor aslo. Konnench tankam asro dilo nam.
Heam fattleam don vorsam bhitor Pap Saib Francis hannem Communion – Participation – Mission, ho “16th Ordinary General Assembly of the Synod of Bishops” hankam vixoi ghetla. Hantunt Goy-ant Participation vo Sohobhageliponn hacher chodd bhar ghalun niallunk proitn kortat. Mhonntoch amchea soglleam lagim hem koxem korunk xokta tem polloum-ia ani mott’ttea nettan Natalam somorombhum-ia.
Soglleank tumkam kuxalborit Natalam anvddetam.
Tumcho Padr Vigar
Fr. Andrew Pereira