Chear vorsam fattim mhaka PPC member munn vinchun kaddlem tednam hanv matxem gabhorlem. Ho Igorjecho vavr mhoje lagim zatolo kai? Mhaka titli zannvai na. Punn Devacher patieun hanvem fuddem pavl marlem. Padr-Vigar ani Padr-Kur- achea sangata dor mhoineant amcheo PPC-cheo Zomati zatat ani tantunt ami bhasabhas kortat ani tachi mahiti ami amchea Sectorak kolloitat. Dis, mhoine vetam – vetam Igorjecho vavr mhaka il’lo – i’llo somzunk laglo ani hanv umedin ani hurben ho vavr mhojea Sector-achea ani her PPC vangddiam borobor fuddem vhorunk laglem. Padr-Vigar ani Padr-Kur-acho goroj tedna mhaka khub adar mevlo. Soglleancho adar naslo zalear ho vavr hanv fuddem vhorunk xokchem naslem. Jedna Misachi mandavoll korchi asli vo veg-veglleo kariavolli ghoddun haddcheo asleo tedna mhojea Sector-achea vangddeamcho mhaka khub tenko mevlo. Zaum to vellacho, vo poixeancho vo kariavollinim apli umed dakhouncho. Jednam sogllim eka monan ani ekvottan vavr korunk fuddem sortat tednam bhav-bhoinnicho ekchar disun ietalo ani hem polleun ek PPC member koxem ho Igorjecho vavr fuddem vhorunk mhaka anikui nett ietalo.
Tor mogachea bhava-bhoinnino, ho vavr mhoje lagim zata zalear tumche lagim kiteak zauncho na? Hanvem mhoje lagim zata titlo vavr kela. Tumi ghoddie mhoje-von odik korunk xoktat. Bhurgim-ballam ani ghorantlea toxench bhailea rattavollini gull astanam ho vavr korunk avgodd zata. Punn hi Igorz amchich nhoi? Sogllim fattim sorlim zalear ho vavr konn fuddem vhortolo? Itleo rattavolli asun legit jedna ami Igorjechea kamank vell ditanv tedna amchim kama sompeponni sufoll zatat, hem hanvem mhojea jivitant onbhovlam. Ami Igorjechea sonvstent misoll zatanv tednam amcho sombond Deva-lagim odik vadtta. Tor tumi fattim soronakat punn fuddem sorat ani hi Igorj aplench ghor mhunn somzun nettan vavr korunk mukhar ieiat.
Octoberachea mhoinneant novo Parish council ghoddun ieuncho asa. Tumcho sogllo sohokar PPC member-ank meuta tedna tea PPC member-ancho bhar il’lo unno zata ani ho igorjecho vaur bore baxen fuddem veta.
Dev borem korum!
Julie Baptista
PPC Member – Sec 5