Mogall Firgokaramno,

Boney M hea zomeachem ek adlem Inglez kantar tumi aikolam astelem. Tem Stotr 137 hacher tharailolem asa. Tacheo poileo don volli oxeo asa,

“By the rivers of Babylon, there we sat down
Yeah, we wept, when we remembered Zion.”

Hebrew lok apleacher porko raza Nabuchadnezzor raj choloita ani apleak Babylon-ient nirvaxi korun vhel’le kodden Dev ani Dev-mondir naslele kodden aplim khebaddan korunk Jerusaleantlim (Zion) kuxal bhokti gaionam korunk sangta dekhun khub dukhi zaun Stotr 137 hea voilea gaionant mellta. Tea nixttur Nebuchadnezzar razan Hebrew lokak khub dukhoilim. Tankam Dev nam kelo ani devosponnui nam kelem. Nimannem vhoddponn tanchem devmondir aslem tem legun tanche koddlem kaddun vhelem.

March 15ver uprant tem November 15ver mhollear sarkhe att (8) mhoine lokak igorjent paim legun dovrunk sarkhem mellunk nam. Dusre vatten akhea sonvsarak ani amchea Bharotant soglle vatten bhirant, akant ani mornnam borobor kitle sogott koxtt dixtti poddle. Nebuchaddnezzar raza oslo nixttur Corona rog zaun soglleank koxtt dile. Mon’xam koddlem sogllem kann’n ghetlem. Moronn ani bhirant soglleak fankarli. Dev-mondirachim dharan bond kelim ani devosponn legun tharlem. Oslem anik saiba amkam pollounk kednanch nirminaka.

He osle dis fattlean dovrun atam mukhar panvl marun lokak il’lem il’lem igorjent ieun aplem devosponn korunk meulam. Sogllo Kristi lok apleach ghorant ani ganvant pordexi koso zaun poddlolo. Igorzo ugtteo korun lokak atam sod’dam misak ieun aplem devosponn korunk mellta. Naslem tem meulem mhonn lok kuxal zaun igorjent ieta. Atam ki lokak misacho mog ani mhotv kitem sarkhem somzotelem. Teach borobor konnak misacho ani dhormancho kitlo mog asa tem bi odik bore baxen dixtti poddtelem.

Fattlea pondra (15) dis soglleank misak ieunk mellta te baxen somudaiank dis vanttun ghatleat. Hea Dezembr mhoineant zata te baxen ani goroz tednam misam vaddoileant. Soglleanim ieunk proitn korcho. PPC vangddi ani Volunteers hannim zata titli bori mandavoll kelea. Tumi tankam odik sohokar ditelim mhonn hanv ravtam. Zonn eklean ap-apli zobabdari samballchi ani kallji gheunchi. Dusreank guneavkar korchem nhoim.

Dezembr mhoino mhollear rokddench Natalancho ugddas ieta. Tan lagta tednam udkacho ugddas ieta te baxen amkam-i he pavtt ogeponnantlim bhair sorunk natalam bovall zai distolo. He pavtt sod’dam bhailea somarobha baxen ghodd-ghodd ani bovall ghoddie zauncho nam. Poileach natalank (Jezu bhurgo koso zolmol’lo tednam) hech baxen kosloch bovall ani ghonn-ghonn naslo. Sogllem xant aslem. Gorvam rakhnne thonddien kodd-koddun aplea mendrancho rat-pahro kortale. Tednanch ki tankam Jezu-chea zolmanchi bori khobor meuli. Osle xant-taien Jezu-chi bori khobor amkam-i mellum. Amkam Jezu-ch mellum. Axen ravot zalear jerul amkam Jezu melltolo.

Tumkam soglleank kuxalborit natalam anvddetam.

Tumcho Vigar,
Fr. Andrew Pereira