Mogall Firgozkaramno,

“All work and no play makes Jack a dull boy.” Hi Inglez mhonn’nni zaitea kallachi. Ti aiz pasun khori asa. Dor monis vavr korta taka sogllo vell vavr korit ravunk zainam. Nam mhonn tem mon’xak borem. Tea pasot vavr kelea uprant thoddo tori vell visov gheunk zai vo ani kitem mon’xachem mon xant korpa sarkehm korunk zai. Hi adli mhonn’nni vaddleleank mhonnloli, punn ti atam chodd korun bhurgeank sor kel’li amkam mellta. Bhurgem sogllo vell aplim pustokam gheun xikunk bosta zalear tachean tem bhes borem korunk zainam. Thoddo tori vell khellun sarunk goroz.  Kitem tori dusrem ani vegllem korunk zai. Tednanch ki uprant bhurgeachean anik ek pavtt aplim pustokam gheun odik borem xikunk zata. Heach pasot xallent disak chear-chear periods zatoch interval asta. Ti-tin mhoineani xallent sutteo asta. Oxem zalem mhonntoch bhurgeank xikxonn korunk odik nett mellta.

Xikpacho ani suttiancho vixoi hea fattlea xikxonnik vorsa sarkhoch orth naslolo koso zala. School mhollear school sarkhem nam. Ani sutteo mhollear sutteo sarkheo nam zalea. Xiktolo mhollear kitem xikchem ani khelltolo mhollear khoim ani konna vangdda khellchem to ek vhoddlo proxnn zalo.

Mai mhoineachea poilea suman mhollear lhan bhurgeancho result ietlo ani vhoddlim bhurgim apleo porikxa suru kortolim. Fattlea akhea augoll vorsa bhitor konn sogllem soddun dilo to foslo. Punn konn xanno to aplem kam korit ravlo.  Adkollim modem amchem vhoddponn dixtti poddun ieta. Avoi-bapain ani dusreamnim oslea adkollim modem aplem kuttumbh rakhun dovorlam tankam xabaski. Konn dusreanchea adharak pavla tankam amcho bhovman.

Atam fuddem ietela adkollink fuddo korunk toiar ravchem. Sorv bhonvtonnim moronn ani roddnneacho avaz aikunk ieta. Tantuntlean mon’xachi osoktai ani Devachi podvi disun ieta. Fokt Devakuch mornnacher podvi asa. Paskanchea kallar ami asat mhonn ugddas dhorcho ani dor eklean jivachi kallji gheunchi.

Dev tumkam rakhum ani samballum.

Tumcho Padr Vigar
Fr. Andrew Pereira