Mogall Aquemchea firgozkaramno!

Matevachea Xubvortomanant Jezu aplea Xisank sangta, “Sogllim tumi koxtt kortat ani vojeachea bhara khal asat tim mhoje xim ieyat ani Hanv tumkam somadhan kortolom”. Adunik mon’xachem jivit odik sudarot zait gelam, toripunn to zaitea rattavollinim ghunttlolo amkam mellta. Zo munis apunn sogllem zanna ani apnnachean dusrea viret raum ieta, oxem chintun vagta, kudh Deva ani pelea mhukar lojek sampoddta. Mon’xachean Deva, bhav-bhoinna ani xristti viret raum nozo. Patkachea soimba vorvim dhukhovlolo monis aplem dukh kallzant samballun, kollonastana dusreank dhukoita ani oxem apunn jietolea axantichea durdoxent dusreank oddun vhorta.

Otumbracho mhoino Ruzai Saibinnik bhettoilolo mhoino ani amchea ghorabeant Saibinnichi bhett. Hio donui ghoddneo amkam, Mai Mariek amchea jivitachi ani ghorabeachi sangatinn korunk ulo marta. Tichem jivit niyallunk ani tichea asrea khal amchem jivit jieunk amkam ek sondhi.

Maria, Xantichi Ranni! Eka mon’xachem jivit hanstem ani khuxal zatolem zalear, sorvbhovtonnim ani aplech bhitor xantichem vatavoronn nirmann korunk goroz. Bhailean xanti asa koxem disot, punn bhitorlean tem nasot zalear, koslo faido!

Mai Maria, Tum xantichi Ranni, amche ani ak’khea sonvsara pasot Tujea Puta Jezu lagim vinoti kor!

Pri Agnelo – Pri Josely.
Tumche Sevek.