Mogall Aquemchea  firgozkarano!

“Ostoriam modem subhagi tum, ani subhagi Tuje kuxichem foll!” Lk 1:40

Setembrache 8ver Povitr Sobha Bhagevont Anvkar Mariechea zolmachi porob somarombhta. Povitr Sobha soglea Santam-bhoktamchi porob tanchea mornachea disa somarombhta zalear, tega mon’xamchi tanchea zolma disacho ugddas dovrun tanchi porob somarombhta. Dezembrache 25ver Jezuchi, Junache 24ver Bhagevont Zuanv Batistachi, ani Setembrache 8ver Mariechi. Soddvonnechea Itihasant tanchem jivit odik molachem.

Devan Mariek aplea Putachi Avoi zaunk vichun kaddli. Tika mull patkantli meklli dovrun, patkavinnem zolmak haddli.  Eke vatten Dev tika aplea Putachi Avoi zaunk vinchta, ani hea apovnneak sobta toslem jivit zaunk kurpen bhorta, zalear dusre vatten Maria meklleponnan Devachea uleak, ‘Hi asa hanv Sorvesporachi chakorn: zaum mhoje sovem tujea utram pormonnem’ oxem mhonnon hoi korta. Apnnak favo zaloli kurpa samballta ani jivitachi yatra sompo poryan samballta.

Setembracho mhoino apovnneacho mhoino oxem amchean mhonnu yeta. Karonn hea mhoineant, Mariechea zolma disa ami Avoiyamcho Dis mhonoitanv. Sadhe kallachea chovisvea aitara Dev-apovnneacho aitar ani sadhea kallachea ponchvisvea aitara loukikanchea munniarponnak bhettoilolo aitar palltanv.

Tor ami sogllim amchem apovnnem odik Devak manta te porim jieum-ya ani Deva mhukar Marie bhaxen subhagi zaunk vavrum-ya.

Tumkam soglleank amchea mogall  firgoz karank, Setembrache 8ver, Mariechea zolma disa-chim ununit porbim ditanv. Ani amchea Avoiyamcher, aple avoiponnachem apovnnem bhes bore toren jieunk, Devacho axirvadh ani kurpa magtanv.

Pri Agnelo – Pri Josely.

Tumche Sevek.