Mogall Firgozkaramno,

Hea 2021 vorsan amkam sobar avhanam haddleant. Tim sangpak ani mezpak fursot soit nam. Dor disa ami ek novem jivit jietat kai dista. Novem/dusrem jivit (second life) mellop mhollear ek vhodd bhag. Punn tem koxem jieunchem tantunt vhoddponn asa.

Ek pautt pausant ek render maddar choddttalo. Vhoir chodda astanam tacho hat nisorlo ani to render vhoir thaun sokla poddlo. Punn tachea borea noxiban to vattoulo. Dusri vost zali ti hi. To poddlo mhonn bhielo ani maddar choddpacho vavr tannem tea disa thaun soddlo. To anik maddar kednanch porot choddlo nam.

Francis of Assisi ek pautt zhuztalo tednam ek ranantlean porot ghora ietalo. Punn ietanam tachea sorv-bhonvtonni ran (forest) ujjean lhastalem. Ted’dea vellar tannem bhasavnni keli. Apunn jivo urot zalear aplem akhem jivit Devak bhettoitolo mhonn. Ani khorench tannem aplem jivit fokt Devak ani tachea vavrak bhettoilem. To sant zalo. Tachem dusrem jivit (second life) Devak bhettoilolem zalem.

Bhagevont Sebastiao Rome xarant Emperor Diocletian-ache foujent astanam zaitea xipaiank  Kristi xikounn dili ani kristanv kele.  Hi khobor aikun taka jivexim marunk formailem. Taka ganva bhair vhorun bhale (arrows) marun uddoilo. Punn tachea borea noxiban to vattoulo. Taka ek dusrem jivit mell’lem (second life). Tachean ‘jiv aslear bhik magun dis sarunk ieta’ mhonnuk zatalem. Tachean pois ravunk zatlem. Punn nam. To porot ieun adlea von odik Jezu-k porgott korit ravlo. Bhagevont Sebastiao-an aplea jivachi porva keli nam. Bhavartant lokak dhir di-it ani adhar korit ghelo. Aplem dusrem jivit (second life) adlea von odik folladik kelem.

Hea adhunik kallar soglle vatten bhavart-ak lagun bhirant koxi ieta. Lipun ravum dista. Bhavart soddum koso dista. Kristi jivit naka zata. Tednam oslea vellar Bhagevont Sebastiao amkam ek dhir, adar ani dekh zata. Dev amkam dor disa ek dusrem jivit (second life) di-it asa. Fattlea disamnim zaito lok covid-ak lagun morun ghelo. Konn boro zaun vattoulo. Tea bhair zaiteo ghoddnneo zait asat. Bhirant dista. Punn Toch Jezu amkam zaitea borea ani kalljidar mon’xanchi dekh dita. Amchem dor disachem dusrem jivit (second life) odik orthaborit zaum. Kristi mon’xak sobta toslem. Amchea askarea St. Sebastiao-a baxen ami sogllim zaum.

Soglleank tumkam St. Sebastiao-chi kuxalbhorit porob anvddetam.

Tumcho Padr Vigar,
Fr. Andrew Pereira