Tadev: Devachea axirvadan bhorlolo dis tuka anvddetam,Simao Titiv.
Simao: Tukai anvddetam Tadev.Zaitea disanim ami eka-meka thaim ulounk pavleanv,nhoim?Velluch mellonam,boson nhoim zalear,ubech tori ravun gozal-mat korunk.
Tadev: Oxem zaunk koslea kamanim misoll zalai tor tum?Novo dondo vo kosli nokri-ba korunk lagla Kai kitem?

Simao: Nokri vo dondo?Nam baba nam.Hea disanim veta thoim sabar ganvanim eke vegllech torechi chollvoll suru zalea ti tunvem aikonk nam? Tantunt hanv vattekar zalam.
Tadev: Chollvoll ani kosli?
Simao: Goem anim amchi zomin rakpachi chollvoll.Goeant bekaidexir vhoddlea suvatancher vhoddleo imaroti anim ghoram ieunchim asat,tancher vhoddlo bovall anim nixedh cholta.
Tadev: Potrancher vachlam Titiv.Hem soglem amchea Goenchea ganvanim cholta nhoim?
Simao: Oi.Zaite amche ganv,zoxem,Sancoale,Reis Magos,Aldona,Old Goa,Tivim ani ier sabar ganvanim Goeam bhaile motte,motte “builder” anim udyog poti,kaide moddun vhoddleo imaroti anim ghoram bandunk sodtat.
Tadev: Punn tanche thaim koslich porvangi nant?
Simao: Choddxem bekaidexir cholta anim sangchem mhollear amche Montri anim lagu zatele odhikari tankam sangat diun tankam adar kortat.
Tadev: Ghorcho bedi anim bhailo chor,oxem zalem tor?
Simao: Sarkem tujem.Veta thoim broxttachar anim soglo poixeancho khell.Konnuch zobabdari gheunk toiar nant anim dusreancher boglanttam ghaltat.Poixeancheo suitcases ani vhoddleo sagvadi pavleo mhonntoch,amchea Panchyat anim dusrea kocherintlea odhikareank him kamam korunk mat punn bhirant pasun asonam.
Tadev: Goenkarank faido zateleo ievzonneo vevharant ghalche suvater,oslim nattkam korunk koxem mhonn puttvota zait hea noxttea monxeank.?
Simao: Faido anim koslo.Veta thoim luksann.Him ghoram anim imaroti ietat teo amchea bhavam bhoinnank gheunk bhov kottin,kiteak te bhov marog viktat-vhoddle lak anim kotti.Tea bhair amche dongor katrun,vhoddlim vhoddlim zaddam katrun amchea poriavoronn-achem nisontonn korit asat.
Tadev: Amcho fuddar vaitt doxer pavtolo mhonn,amcho Sorkar kiteak chintinam kai?
Simao: Tankam amchea fuddarachem poddlolem nam.Ap-aplim bhollsam,hoch tancho fuddar.Amche zaite “ACTIVISTS “bhav fuddem sorun,zaite tras kaddun amkam adar kortat,anim zaiti mahiti RTI-ache vorvim,sodun kaddtat anim lokak xiddkaitat.Te nasle tor,amkam kainch khobor mellchi nasli.
Tadev: Dev tancher besanv ghalum.
Simao: Tanchech vorvim zaitea suvatancher chollvoll suru zalea anim amchea lokak sogle ghutt ghomun aileat.Amcho ganvcho lok atam zago zala oxem mhojean mhonnonk zata-nixedh marunk fuddem sorla tem polleun borem dista.
Tadev: Soglim hatak-hat ghalun fuddem sorlear amkam ies mellonk xokta.
Simao: Jerul melltolem,amchea sangata Dev anim amcho Goencho Saib assa.Amchea Sorkaran anim soglea lagu zatelea odhikareanim boreak poddtat tech nirnnoi gheunk anim bekaidexir asat teo ievzonneo tannim fattim gheunk,ami tanche khatir magtanam -tankam borem anim nitoll mon magumia.
Tadev: Goencho anim Goenchea lokacho fuddar boro zaunk Devanuch amkam rakhchim anim samballchim.
Simao: Oxench zaunk magumia. Borem vetam hanv.Tum boro korun voch.
Tadev: Borem tor,tum sintidan voch.

-Felix Dias