Tadev: Dev Boro dis dium, Simao Titiv. Tuji bolaiki koxi asa?
Simao: Tukai dium Tadev. Devache kurpen asam boro.
Tadev: Tujem mukhamoll chintest-xem dista. Kitem zalem tor? Chodd pavs poddon, tuka luksann zalem?
Simao: Nam, amkam kaim luksann zaunk nam, Devak argam. TV ani potramcher pollelear kitlo lok trasant poddla. Ghoram moddlim, xetam roilelim vanvon ghelim, buddti aili, thodde roste nanch zale, zhaddam poddun thoddeancho jiv pasun ghelo.
Tadev: Oi, pollounk ani aikunk vaitt dista. Amkam xharanim ravteleank vhodd ontor zaunk nam. Tambonastanam kitle dis pavs poddon ami ghorant bhitoruch aslim.
Simao: Europe-achea desanim porian zaitea suatancher buddti eun kitlo lok moron ghela ani kitlem luksann zalam tem ami pollelam. Thoddea suatancher oslem kednanch ghoddonk nam mhonnttat.
Tadev: Devacho gutt Dev zannam. Mhonxea-chea hatant kainch nam.
Simao: Sarkem tujem. Dor ek vost ani dor ek ghoddi, Devache hukume bhogor cholonam.
Tadev: Zaite pavtt hem sot ami visortanv ani ami amchi podvi dakhounk sodtanv.
Simao: Punn Devacho axirvad nam zalear, soglem “umtea kollxear udok”, osli ghot zaunk pavta.
Tadev: Luksann zaleleank, sorkar modot ditolo mhonn kolloilam nhoim, Titiv?
Simao: Oi, tankam adar veginuch dilear puro. Oslea vellar thodde dalal apleacho faido polletat ani goroz tankam mozot mellonam.
Tadev: Oxem ghoddonk favonam ani Sorkaran koddok upai gheun favo tankanch ho adar diunk goroz.
Simao: Devan amkam sogleank rakchim ani surokxit samballchim mhonn ami Devak prarthonam ubarunk goroz
Tadev: Oxench zaum!
– Felix Dias