Simao:Tuka Dev boro dis dium, baba Tadev.
Tadev:Tukai dium, Titiv, Tuji bolaiki koxi asa?
Simao:Devache kurpen hanv boro asam. Tujeo suttio kobar zaleo nhoim? Atam boro korun xikpache dis aile.
Tadev:Oi Titiv. Matxe visov favo zalo ani atam porot “adlean chalu”.
Simao:Raxtria Khellant bhag gheunk tuka sondhi meuli ki nam?
Tadev:Tea Khellanim bhag gheunk zaiti huxarkai dakounchi poddta punn hanv tea vorgant poddonam. Hanv ‘sumaracho’ khellgoddi oxem mhojean mhonnom ieta.
Simao:Tum tuje proitn chaluch dovor ani mhaka khatri asa, jerul ek dis tum hea khellanim bhag gheunk iesvont zatolo.
Tadev:Borem Titiv. Tum zannaim, hea vorsa Goeam bhaile khellgoddi, GOA – prantachea nanvan bhag gheunk misoll zale ani zaitim inamam jikun ghele.
Simao:Hem aikon ani vachun hanv ekdom ojap zalom kiteak mhaka dista Goenchea sorkaran tankam porvangi diun chukh adarli mhonn.
Tadev:Fokot inam jikun gheunk tankam Khella Khatea vorvim tanchim nanvam nond korun ghetlim mhonn zaitea zannanim nixed passun porgott kela.
Simao:Hem pavl bhov chukichem. Inam jiktoleank hea fuddem nokri passun rakun dovortole mhonn sorkaran kollit kelam. Mhonntoch Goeam bhaileank nokri dhilear, amchea bhurgeanchem kitem?
Tadev:Tea bhair ispa bhair, kitleoxeo kotti moddun he khell korun kaddle. Tancho faido fuddle pillgek zalear puro.
Simao:Zaiteo noveo-noveo sovloti zoxe porim Khella moidan, dhavpatti (running track), adi, Goenkarank toiar zaleo ani sodanch urtoleo mhonn asvason dilam nhoim?
Tadev:Oxem kelearuch amkam faideachem zatolem nam zalear zaitea suatancher moidan-achi durusti korun, bond dovorleat ani vaprunk porvangi asonam, toxem ghoddon ieunk favonam, nam tor omtea kollxear udok koxem zatolem.
Simao:Sarkem tujem. Hea khellank lagon zaito vad-vivad zalo ani broxttachar bhorpur kelo mhonn lok arop kortat.
Tadev:Zuttier aslole aplo odhikar vaitt toren vapurtat ani nanv ogddaitat.
Simao:Devak passun hem borem lagonk nam dista kiteak nimannea disamnim zaito pavs poddon, kitlem nuksann ani ibadd zalem tem ami pollelam.
Tadev:Lagu zateleanim hem dolle ugddun pollelear puro. Borem vetam hanv. Titiv, tuka ani tuje familik khuxalbhorit Natalanchi Porob anvddetam.
Simao:Tukai anvddetam. Devan ani Ballka Jezun amcher soglleancher axirvad ghatlear puro.
– Felix Dias