Tadev: Simao Titiv, hea sanjechea vellar, khoim vetai?
Simao: Baba Tadev, hanv Moddgonvam, Lohia Moidanar vetam, kiteak thoim ek jahir sobha zaunchi asa. .
Tadev: Sobha, ani kosli?
Simao: Zannai Tadev, aiz Janer-achi, sollavi (16vi) tarikh ani aichea disa, 1967 vorsa, venchnnuko zaleleo Goencho fuddar tharaunk.
Tadev: Venchnnuko kosleo?
Simao: Amche Goem, Maharashtrant ghalunk sodtale taka lagun don mud’deancher venchnnuko zaleo. Goem Maharastrant vilin korchem vo Goem Vegllem urchem.
Tadev: Hanv tednam zolmunk passun nam Titiv.
Simao: Oi Tadev. don nixanneo asleo, ek ful (vilin korcheak) ani Don panam (Vegllem urcheak)
Tadev: Ani mhaka dista Don Panam jikhlim nhoim?
Simao:Tunvem sarkench sanglem. Kitlo vhodd ani khoxalkaiecho Dis to amkam Goemkarank. Ami amchi asmitai (identity) rakhun dovorli, nam tor aiz ami Marathi uloupache, Maharashtrian zaupache.
Tadev: Hi khobor soglea bhurgeank, tornnatteank, gomon ieunk zai. Mhojea sarkeleank achi mahiti bilkul nam.
Simao: Amchea Sorkaran hem korunk pavlam marchi goroz asa. Ho dis vhodde urben monoupacho punn oxem ghoddche suvater tacher visor ghalpache proitn choltat.
Tadev: Punn tea disa sobha konnem ghetli tor?
Simao: Sobha Virodhi Pokx vo Congressin ghetli. Amche Montri ani Amdar visortat, Goem Maharashtrant vilin zalolem zalear, heo Zut’tio tankam mellpacheo mhoim, punn Goa, ek Zilla (District) koxem aspachem. Hea Vixoiacher, Rajkaronn korunk favonam kiteak ho amkam Goenkarank ek vhodd Dis ani to ami ghonnghonnan monounk zai.
Tadev: Zaite zann te venchnnuke vellar vavurle astele nhoim, Titiv?
Simao: Vavurle tor? Zaitea zannanim dis aslole rat korun ani rat asleli dis korun, pott-tiddken vavurle dekhun amchem zoit amkam favo zalem. Sorgest Dr. Jack de Sequeira amco fuddari aslo ani tachech vorvim amkam zoit meulem.
Tadev: Tor taka manacho zago dila vo nam?
Simao: Toddea suatancher zoxem Calangute (tacho zolmancho ganv), Ambelim tache puttle ubarleat punn khas Vidhan Sobhent puttlo ghalunk amdar amche, Rajkaronn kortat. Lojechi khobor hi.
Tadev: Khorench lojechi Titiv. Tannim tache upkar attounche suater, te oxem kortat. Amkam kosli dekh dhitat kai?
Simao: Dev tanchem kortub pollesor polletolo. Tum mhoje borobor ietai?
Tadev: Oi Titiv, hanv ietam, aiz mhaka Tution-ak sut’ti asa. Mhaka zaitem aikonk melltolem, Chol ia.
Simao: Hi polle City-bus aili, ami vochum-ia.
– By Felix Dias