Tadev: Dev boro dis dium tuka, Simao Titiv. Ami zaitea disamnim meutat, nhoim? Tum koso asa? Simao: Tukai Dev kurpa dium, Tadev. Hea gormechea disamnim choddso bhair sorunk nam. Hanv boro asam. Tumche Abril-Mai, he chodd umediche ani apurbaieche mhoine suru zale nhoim?
Tadev: Oi, amcheo suttio suru zaleat dekhun ami kuxal asanv. Punn ami bhurgim choddxim ghorant-uch astanv.
Simao: Amchea bhurgeponnar ami chodd ghora bhair astaleanv, tenvuim bi moidanar khellunk vo follam ektthaim korunk, zoxem ambe, kazu, kannddam, chun’nam ani ier.
Tadev: Amchim avoi-bapui, amkam hench sangtat.
Simao: Aichea kallar bhurgim aplea kuddant khattir vo sofacher add poddun aplo ‘mobile’ vo ‘tab’ gheun aplo vell sarlolo distat. TV naslear pasun cholta, punn mobile ani tab tankam chodda molachim. Ghorantuch ravpachi sonvoim tanche modem vaddot asa.
Tadev: Hanv mhoji ‘Cycle’ gheun choddso sokallcho ani sanjecho vell sartam.
Simao: Ekdom borem kortai tum Tadev. Amchea kallar amkam cycle-icho bhorpur faido zatalo. Zaum follam ektthaunk dongrar vochunk, vo moidanar khellunk vellar pavunk ami cycle-cho vapor kortaleanv.
Tadev: Tea bhair to ek vyaam (exercise) koso zata, amche kuddik borea akaran dovrunk.
Simao: Oi sarkem tujem, Tadev. amchem bhurgeponn vegllench aslem – bhov movjen bhorlolem. Mobile vo tab nam, punn ulovop chodd zatalem, dusreancho sangat chodd astalo, ixtt- xezareanger vochun bolkanvant bosun zanntteam modem tanchea sukhant-dukhant vantto gheun amcho vell ami sartaleanv.
Tadev: Mhojim avoi-bapui mhaka zaiti budh ditat. Mhaka agro kortat, kola vaddounk, vachonn korunk, sortimnim vantto gheunk, songit xikunk, veg-vegllea korsanim bhorti zaunk. Amkam suttio asat mhonntoch hoch vell boro amkam faido kaddunk kiteak xallechea disamnim vell mellonam.
Simao: Hi ekdom bori gozal. Dusrea bhurgeamnim tuji dekh gheunk goroz.
Tadev: Thokos gheun oslea kamanim vell sarlear ani bore xistin ravlear zaitem amkam faideachem zaum ieta.
Simao: Tadev bab, ek monant dovor, vell konnak ravonam korunk dista tem kor ani gineanachi vadd zaunk ghoddtta te upai gheunk proitn kor. Borem tor vetam hanv.
Tadev: Tujea borea sallak (advice) chodd Dev borem korum Simao Titiv. Hea disamnim ghormi vaddlea dekhun bore toren jivachi kallji ghe.
Felix Dias