Mogall Firgozkaramno,
Prachit ani Paskancho kall amkam Devachea zaitea boreponnacho ugddas korta ani niallunk adhar dita. Zaiteam borea vostum modem amkam borim mon’xam zaunk vo amcho sobhav odik boro vo bhagevont korunk (change our attitude) usko korta.
Jezu, ballok koso zolmolo tednam soglle osoktaien bhorlolo koso dislo. Jezu vaddlo tednam ek okhondd dadlo koso dislo. Koxttancho vavr korpi. Hanga thoim sodd-soddit vochpi. Bhovxik vavr (public ministry) kortanam sogllo kalljidar ani podvedar mhonn dixtti poddlo. Konnak bhiena zalo, nam mhonn vatavoronnak, soimbak vo Judevank nam mhonn dhorm-xastriank. Oso Jezucho akar bodlot ghelo. Sogllo podvedar mhonn lokak pollounk mell’lo.
Jezuchea koxttam vellar To sogllo osokt koso dislo. Sogllem urfattem zalem koxem dista. Taka tannim dhorlo, mar ghatlo ani voll-vollailo. Punn Jezun apleak vattaupak porot kainch korunk nam. Morun punorjivont zalea uprant Jezu ollkhunk sarkhoch mellonam zalo. Tacho sobhav ani akar sarkhoch bodol’lo. Tache khaxa xis ani bhov lagxil’lim legun ollkhunk koxttovtalim. Tanchea fuddeant legun ubo aslear vo uloitana legun ollkhunk vell lagtalo. Dekhik, Lk.24/30-31 “Tanchea sangata jevnnak astana, tannem unddo ghetlo, Devak dhin’vaslo ani to moddun tankam dilo. Tednam tanche dolle ugoddle ani tannim taka vollkholo, punn to tanchea dolleam mukhavelo nanch zalo.”
Vell ani kall sortanam mon’xancho legun sobhav boreak vo vaittak bodlot veta. Punn fattlea Prachit kallant amcho sobhav (attitude) apleach sovem ani dusream sovem bodlunk vo boro korunk porot-porot ugddas kela. Dor eke Paskanche porbe somoiar amchem adlem vaitt jivit, sonvoim-eo, sobhav soddun diun novo akhar, novo sobhav, noveo ani boreo sonvoim-eo gheun borim mon’xam zaunk amkam favo zaum ani adhar mellum.
Teach anvddeanim tumkam soglleank kuxalbhorit Paskanchi Porob anvddetam.
Happy Feast to all.

Tumcho Padr Vigar,
Fr. Andrew Pereira