Mogall Firgozkaramno,

Fattlea panch (5) mhoineanim Covid-19, Corona Virus, Pandemic ani mornna, him utram hozar pautti newspaper, television ani mobile/whatsapp-acher polloun ani aikun kan bosleat ani tokli bherelea asteli. Tantunt modem zaitea lokacheo sirviseo gheleat ani bekarponn ailam astelem. Bolaiki, vell ani xikop asa punn sirvis nam. Ghor asa punn poixe nant. Osli itli amchi poristhiti ghoddie zaunk nam asteli, punn desant dusream suvatancher zait veta. Fattlem chitr polleit zalear bhirant dista ani akant ieta.

Atam fattlean pollounk nhoim punn fuddem polloun nettan pavl marpacho vell aila.  Fattim zalam tachi molavnni korunk ekdom sompem. Choddxim mon’xam hench kortat. Punn ho vell atam fuddem polloupacho. Ekdom gorjecho.

Atanchea serkaran desachi ani lokachi durdorxea korun soddlea. Tanchem mon fokot haddli podd ani khaili podd zali. Itlem, ki tannim Reserve Bank-ant reserve poixe gorjek dovorlole te legun ibadd korun khobar kele. Atam gorjechea ani akantachea velar ho reserve poiso aslolo zalear gorjevontank faideacho zaupacho. Atanchea serkaran fuddlem mat pun chintunk nam. Akho des kallokant pavoilo. Tanche lagim atam fuddem kitem korchem tem monant kainch nam. Oxem polloit zalear fuddle vat kalloki rat koxi dista.

Oslea kallokant ani addkollim modem choltanam, hi vatt zaitench xikoita. St. John of the Cross, ‘Dark night of the Soul’, hea aplea pustokant otmik jivitachi khobor korta. Oslo onnbhov soglleank ailolo ekdom gorjecho,oxem to mhonnta. Tantuntuch atmik jivit vaddta ani Devak monis lagim sorta mhonn to xikoita.

Atanche pillghen koxtt mhonntat te choddxe onbhovunk nam. Karann Bharot-ant grestkai iet asleli. Pidda-rog ani mornnam ailolim  oxem adlea mon’xam lagim ani pustokancher itihasant aikol’lem. Dolleanim pollounk ani jivitant onbhovunk nam. Mhonntoch atam dixtti poddta tem sogllem‘first hand experience’.

Adlea korarant Israel lokacho itihas legun hech baxen zatalo. Tancher dusre nixttur raza raj choloitale, Dev-mondir moddttale. Devosponn korunk mellonaslem. Ispa bhair mornnam ietalim. Tednam lok Devak ollkunk pavtalo. Lok Deva fuddeant ietalo.

“Sometimes it’s the journey that teaches you a lot about your destination”- Drake oxem mhonnta. Amkam hea sonvsarant-ui ek xevott asa ani hea sonvsara fuddem-bi ek xevott asa. Hea sonvsarantlo xevott mhollear jivit odik borem ani kuxal zaunk zai. Hem zaunk zonn eklo fuddem kitem kortolo ani koso kortolo tem barik polloilear ekdom faideachem. Kosli-i sirvis asa zalear thondd dampun samballpachi. Nam zalear nove torecho vavr korcho poddtolo. Tujem ani ghorcheanchem pott tori bhorunkunch zai. Poixe kitem asa zalear samballun khorch korpacho. Ghorcho konnui iadkollink sampoddla zalear ho asa boro vell tankam adhar diupacho. Nett marpache ani vhoddponn dakoupache dis  fattim ghele. Akho sonvsar porot grestkaient ieta mhollear  khub vell (vorsam)lagtolo.

Otmik vatten-ui ek xevott asa, to mhollear sorginchem jivit, Devacho sangat. Hea fuddleam disanim addkollim modem dor ekleachem khorem vhoddponn ani monisponn disun ieum-di. Hea vellar kelolem boreponn dor ekleak otmik vatten faideachem zatelem.

Hem sonvsari poinn ami kaddumkunch zai. Jezuche koxtti vattentlean amkam vhodd xevott asa to boro nivoll disum-di.

TumchoVigar
Fr. Andrew Pereira