Akhea vorsa bhitor zaite toreche dis monoupak suru zaleat. July mhoino mhonntoch Bhagevont Joaquim ani Anna, Saibinn maie-chim avoi-bapui ani sonvsari nodren Jezu monis zal’leachim xepai ani xemai. Hi tanchi porob July-ache 26ver somorombhtat. Hem monant dovrun teach disa July-ache 26ver xepai-xemai cho dis kortat.

Xepai ani xemai zaunk ek lhan xem punn apurbaiechem bhag. Karann, eke vatten atam zaiteanger ek vo fokt don bhurgim astat. Thoddeanger bhurginch zainant. Thoddim atam natram asunk tanchim bhurgim kazaruch zainant. Ankvar ravtat. Mhonntoch barik nodren ek xepai-xemai zaunk ek lhan xi punn sadhi milagr.

Dusre vatten, xepai-xemai zaunk vo natram asunk ek dadoskai. Lhan lhan bhurgim (natram) ghorant roddtat-hanstat, khelltat ani dhanvun ieun vengent poddtat, kitli vhodd kuxalkai. Lhan bhurgeank pollelear tan ani bhuk nivta. Oslem chintop ghoddie il’lem pornem koxem dista. Karann aiz-kal family sarkheo lhan zait gheleat. Eke vatten bhov thoddim bhurgim ani dusre vatten ghov-bhail ani ek vo don bhurgim ek famil zaun sarkhinch vegllim vo dusrea ghorant separate ravtat. Lhan famil sarkhich anik lhan zatat.

Vhoilem sogllem monant dhorun xepai ani xemai hancho ek vhoddlo proxnn ubo zata. Hea mhatarim zal’leam xepai xemaik konn samballtolo? Tanchem vaitt borem konn kaddtolo? Atam Covid-19 hi pidda zal’leak voile proxnn sarkhech odik vhoir sorleat. Poir fattim mhaka ek whatsapp message aili. Chodd korun dista USA thaun kai mhonn. “Please deliver the following items “Kando, losunn, khotmir, bottatte, cooking oil, wheat flour, tinned corn beef to my grandfather at……” (Address withheld). Hi whatsapp message vachit zalear zaiteo vostu somzunk ieta. Hea mhatarea fuddeant konn nam. Nam mhonn ho mhataro aplea xezareank boro nam. To ekloch ravta. Tanchim bhurgim ani natram khoinchean tori chodd pois asat. Daddtat fokot thodde poixe astele.

Vhoilea oslea vellar mhatari pirai ieta tednam ‘getting old gracefully’ ekdom gorjechem. Hem korunk tankam zaiteancho ekdom chodd adhar gorjecho. Mhatarim zateleamnim mandun gheunk zai, apnnak atam dusreanchi goroz zai poddta mhonn. Tankam kuxal dovrunk ani tancho samball korunk tornatteanim thoddo thori sacrifice korcho poddta. Poixeanche axen ganv ani desh soddun pordesant ravun pollun vochunk zainam. Eka kallar mhatareanim legit sacrifice korun lhanank vhodd keleat.

Oxem tor ami kelear, card daddchem soddun “Grandparents Day” ek orthaborit dis zatolo.
Tumkam soglleank mhatarim zal’leank ani xepai-xemaink kuxalborit dis anvddetam ani Deva lagim bori bolaiki magtam.

Tumcho Padr Vigar
Fr. Andrew Pereira