Mogall firgozkaramno,
Novem voros suru zata mhollear jiv soglloch urben toso bhirantin bhorla.

Fattlim birankull don odik vorsam sorun voita mhollear jivak suuu zata. Sogllem vaitt odruxtt ani dukh pois ghelear puro zata. Hem ietelem novem 2022 voros Devache kurpechem ani borem gheun ailear puro oxem soglleanchea tonddar zata. Novem ani borem il’lem, il’lem zait veta. Lokak sirviseo porot mellunk lagleat. Pidda ani rog unnem zala so dista. Vavr dhondo porot suru zata. Xalla porot ugtteo zaleat ani bhurgim xallek vochunk suru zaleant. Dhormacheo suvato vaprunk sompeponn mell’lam. Ek novo bhorvanso fuddem dixtti poddta.

Novem voros ieta mhollear Goy-ant venchnnukam-cho vavr suru zala. He ani te vatten soglleak nove-nove mon’xancho mott’tto naro aikunk ieta. Mhaka jikun haddlear hanv hem ani tem korun dakoitolom. Goy samballtolom. Goy-karank samballtolom. Funkott hem ani tem ditolom. Tumchea Bank account-ant itle ani title poixe ghaltolom. Sogllem aikun monant ekuch proxnn ieta. Atam sod’deak Bank-ant aslole poixe kiteak unnem zatat kai? Karann January 1ler thaun Bank-ant poixe ghalunk charges lagtat ani Bank-antle poixe kaddunkui charges lagtat.

Goy-ant he pautt zaiteo Political Party-s aileat. Soglle ‘opportunist’, mhonnche bovallint bovall korun aplo faido kaddpache monis. Tea pasot dor eka ganvkaran aplo vote ibaddcho nhoi. Karann atam Goy-ant zaito bhailo lok ravta. Tankam amchem vo Goy-chem mat punn poddun vochunk nam. Chodd dukhachi goxtt mhollear they determine our destiny. Aquem ani Margao zalear te chodduch asat.

Goy-ant zaiti somajik zagrutai ailea. Ekdom borem. Voita tea ganvant lok vaittacher zhuzunk lagla. Oxem dor eka Goy-karan sota ani hok’ha khatir zhuzot ravchem poddtelem. Zo zhuzta to xevottak zoitivont zata.

Soglleank tumkam firgozkarank ek novem kuxalborit ani Devachea axirvadan bhorlolem novem voros anvddetam.
Goy-chi novi sakall khorench novi ani bori sakall korunk vavrum-ia.

Tumcho Padr Vigar,
Fr. Andrew Pereira