Mogall Firgozkaramno,
Hea Novembr-achea mhoineant tapman (weather) bodolta. Thonddi vaddta. Tednam zaiteam zaddamchim panam holdduvim zaun sobit distat. Uprant tim piktat ani sokla poddtat. Tachea uprant thoddeam mhoinea bhitor tech khandiek noveo kombreo futt’tat ani novim hirvim panam zatat. Hem soimbant oxem vorsa vorsa zait ravta. Ek pan dusrea panak suvat korta.
Monxeamchea jivitant oxench zaitea torenim ghoddta. Novembr-ache 2rer soglleam meloleancho ugddas kortat. Odik korun konna pasot magnneachi goroz asa punn tache pasot Deva lagim magtolo konn nam tanche pasot ugddas korun odik magtat. Zolmololo ek-ek monis morta ani dusreak zolmunk suvat korta. Morchem vo nam morchem tem amchea hatant nam. Soglleanim morchench poddta. Dusreak zago korun diunchoch poddta.
Sirvisek legun voitat thoim, kitloi boro monis zaum vo kitleim borem kam kor vo nam kor. Ek dis retirement ieta ani thoimsorlo bhair sorun dusreak suvat korchi poddta. Kelolo boro vavr ani tacho ugddas mat sodanch urta.
Heam fattlea mhoineant (October) amche firgojent Parish Pastoral Council novo ghoddunk vavr chol’la. Ek-ek somudaient vochun “1st round of election” korun novim vangddeam vinchun kaddleant. Election korunk dor ek somudaient zaito lok ekthaim zatalo. Polloun zaiti umed disli. He pavtt zaitim novim mon’xam vinchun kaddleant ani soglleanim hanstea thonddan zobabdari gheunk fuddem sorleant. Tankam soglleank ani tancheam gorcheank Dev borem korum mhonnttam. Teach borobor jea ghoranim election korunk zago dilo ani gorjechi soglli toiari bi keli mhonn sontostam.
Atam fuddem vinchun kaddloleank Igorje lagim thoddim xibiram astelim. Thoim Igorzmatechi xikovnn ditele. Vavr korpachi vagnnuk ani pod’dot somzaitele. Xibiram somplea uprant vinchun kaddloleam modem “2nd round of elections” zatelim. Te meren heam vinchun kaddlolea somudaiechea chear-chear vangddeank Devachi kurpa magum-ia. Tankam Igorjechea vavrachi somzonnim ani odik ani odik mog lagunk tanche pasot amcho usko asum.
Ek pan holdduvem zata, pikta ani dusreak suvat korta. Amche-im jivit hench.
Tumcho Padr Vigar,
Fr. Andrew Pereira